Usomabhizimusi Olodumo uMnu. Chiyangwa Uxotsha Abaqondisi be Affirmative Action Group

Umnu. Phillip Chiyangwa ongusomabhizimusi olodumo njalo ongomunye walabo ababumba inhlanganiso yokuthuthukisa inotho yabansundu iAffirmative Action Group uthi usexotshe abaqondisi be AAG ebikhokhelwa nguMnu. Supa Mandiwanzira ngenxa yokuthi kade bengasebenzelani kahle lozulu.

Umnu. Chiyangwa uthi kulusizi ukuthi usexotshe uMnu. Mandiwanzira, unobhala wakhe uMnu. Tafadzwa Musarara, obephethe isikhwama semali uMnu. Elfas Mashaba lokade eligqwetha lenhlanganiso le uMnu. Farai Mutamangira.

Uthi kukhanya njalo ukuthi iAAG ibisebenza ingelasikhwama semali sebhanga okwenze ukuthi kucatshangelwe ukuthi abanye abaqondisi laba batshontshe inkulungwane ezintathu zamadola eMelika.

Okunye njalo okubikwa kwenze ukuthi uChiyangwa axotshe abaqondisi laba yikuthi kulokufuthelana okukhona phakathi komphathintambo wezemigodi uMnu. Obert Mpofu lo Mnu. Tendai Savanhu, ongomunye walabo ababumba inhlanganiso le, ngokuthi ngubani omele ayikhokhele okwamanje njengoba ibandla le ZANU PF liqhuba ngamandla uhlelo lwe indigenization.

UMpofu, esingenelisanga ukukhuluma laye, ukhanya ubedlelana kahle labaqondisi laba abaxotshiweyo.

UChiyangwa ubikwa efuna ukuthi uhlelo lwe indigenization lwenziwe ngodlame kwezemigodi kodwa uMpofu labo Mandiwanzira kade bedonsela muva besithi kalwenziwe kuhle.

Abalandela okwenzakala ku AAG bathi uChiyangwa labanye bakhe sebefuna ukuthi basebenzise iAAG ukwenzela ukuthi bathole amashares amankampani emazweni kuhlelo lwe indigenization.

Umnu. Matson Hlalo, omunye walabo ababumba iAAG uthi okwenzakala kunhlanganiso le akumangalisi ngoba isilabalandeli abalutshwana abafuna ukuyisebenzisa ukuthi baqambule inotho yabamhlophe.