amalinks wokungena

Breaking News

Usuqalile Umncintiswayo wokudinga uMr Zimbabwe


Body Builders
Isiphathamandla senhlanganiso ye Matabeleland Amateur Bodybuilding and Weightlifting Association uSimon Gama, uthi ulethemba lokuba lonyaka iziqhwaga eziphuma esigabeni seMaNdebeleni zizakwenza kuhle emncintiswaneni wokwakha umzimba owe Mr kanye lo Miss Zimbabwe ozakuba khona ngempelaviki ezayo.

UGama ufunge waze wagomela ethi lonyaka loma kanjani kumele isicoco sika Mr Zimbabwe sibuye esigabeni seMaNdebeleni njengoba lesisigaba sizamelwa kulumncintiswano yiziqhwaga zamajaha alengalo eziqatha.

Umncintiswano wokwakha umzimba owe Mr lo Miss Zimbabwe ubusuleminyaka emihlanu ungaqhutshwa ngenxa yesimo somnotho ebesimi manzonzo. Umncintiswano walonyaka uzaqhutshelwa endaweni ye Harare International School ese Mount Pleasant ngoMgqibelo.

Ngesikhathi lumncintiswano ungakamiswa isicoco sika Mr Zimbabwe besihlala sithathwa ngabahlala edolobheni le Harare njalo uGama uthi lokhu bekubangelwa yikuba abayakha umzimba abakoBulawayo baphanga bethuthe baye kwezinye indawo.

Inkinga ebhekane lomdlalo wokwakha umzimba yikuswelakala kosekelo lwemali njalo umncintiswano wokukhetha abadlali abazamela isigaba seMaNdebeleni oqhutshwe ngempalaviki edluleyo ungenwe ngabadlali abahlanu kuphela.
IMabbwa ibikhangelele ukuthumela abadlali abedlula itshumi kumncintiswano we Mr kanye lo Miss Zimbabwe kodwa lokhu akusenelisekanga njalo bonke abahlanu abangene kumncintiswano bahle bafinyelela ukuyancintisa eHarare.

Abaphumelele ukuya kumncintiswano we Mr kanye lo Miss Zimbabwe ngabathi u Confidence Mpala kanye lo Delvin Page bona abazancintisa kusigaba sabasakhulayo abaleminyaka engaphansi kwamatshumi amabili lanye, kusigaba sabakhulileyo kulo Michael Saidi Alimu, uLovemore Munyamana kanye lo John Domingo Lunga.
XS
SM
MD
LG