amalinks wokungena

Breaking News

Usuthisekile Ngomklomelo Owodwa Umqeqetshi weBosso


Mandla Mpofu uMqeqetshi weHighlanders

Umqeqetshi weqembu lomdlalo wenguqu ele Highlanders uMandla Mpofu uthi uyasuthiseka ngokuthola umklomelo owodwa emdlalweni wabo owenkezo ye Chibuku Super Cup abawudlale leqembu le Chicken Inn ngeSonto.

UMpofu uthi umklomelo abawuthole ngemva kokuba ngutshiki lobhanqa 0 ka 0 uzabaphathisa kakhulu ekutheni bedlulele esigabeni esilandelayo esomncintiswano we Chibuku Super Cup.

“Kimi ngumklomelo oqakatheke kakhulu kumkhankaso wethu owokuthi sidlulele phambili kulumncintiswano. Ngibatshayela ihlombe abafana bami ngendlela abadlale ngayo ikakhulu nxa sikhangela isimo esibhekane laso. Ngiyaziqhenya ngabo,” kutsho uMpofu.

Iqembu le Highlanders lilabadlali abayisithupha abazaze bayenelise ukudlala ngenyanga kaNtulikazi ngoba kumele kuqale kulungiswe amaphepha abavumela ukuba bedlale kuleli njengoba bebedlala kwamanye amazwe.

Kusibaya sika Group 1 iqembu le Dynamos libe ngelakuqala ukuthola yonke imiklomelo yomithathu ngemva kokubhaxabula ele Yadah nge 4 ka nya.

Umqeqetshi weqembu le Dynamos uTonderai Ndiraya uthi lokhu kwenzakale ngemva kokwenelisa kwabo ukubhalisa abadlali babo abayisithupha abangazange bedlale emdlalweni wabo wakuqala.

“Kubenzima kakhulu kithi ngeviki eledluleyo ngoba sicini sisebenzisa abadlali esasingazange silungiselele labo. Kuliviki labo badlali abakade bengabhaliswanga bebekhona njalo uzakhumbula yibo abadlala sidlala leqembu le Highlanders kunkezo ye Independence yikho nje konke kuhle kwahamba kuhle,” kutsho uNdiraya.

Kusibaya sika Group 1 iqembu le Dynamos yilo elihlezi phezu kwengalane lilemiklomelo emine kuthi ngemva kwalo kulamaqembu abalisa ele Caps United, ele Harare City, ele ZPC Kariba kanye lele Herentals wona alemiklomelo emibili iqembu ngalinye. Emsileni wengalane kuleqembu le Yadah lona elilomklomelo owodwa.

Iqembu le Chicken Inn lihlezi phezu kwengalane kusibaya sika Group 2 lilemiklomelo emine, okulinani eliphethwe liqembu le Highlanders lona elihlezi endaweni yesibili.

Endaweni yesithathu kuleqembu le Bulawayo Chiefs kuthi kweyesine kuhlezi iqembu le Bulawayo City njalo womabili lawamaqembu alomklomelo owodwa iqembu ngalinye.

Kusibaya sika Group 3 iqembu le Black Rhinos yilo elikhokhelayo phezu kwengalane lilemiklomelo emine, okulinani eliphethwe liqembu le Cranborne Bullets lona elihlezi endaweni yesibili.

Endaweni yesithathu kuleqembu le Tenax elilemiklomelo emithathu kusithi ele Manica Diamonds yilo elisemsileni lingela ngitsho lowodwa umklomelo.

Kusibaya sika Group 4 iqembu le FC Platinum yilo elikhokhelayo lilemiklomelo eyisithupha njalo lilingene ngemiklomelo leqembu le Ngezi Platinum lona elihlezi endaweni yesibili.

Endaweni yesithathu kuleqembu le Triangle kuthi kweyesine kuleqembu le Whawha njalo womabili lawamaqembu kawala ngitsho lowodwa umklomelo.

Ezemidlalo siziphiwa nguJoseph Njanji
please wait

No media source currently available

0:00 0:02:25 0:00

Facebook Forum

XS
SM
MD
LG