Iqembu lenguqu eleFC Platinum lakwele Zimbabwe, lifakwe esibayeni sika Group B ndawonye lamaqembu abalisa ele Al Ahly elakwele Egypt, ele Etoile du Sahel elakwele Tunisia, kanye lele Al Hilal elakwele Sudan esigabeni esezibaya esomncintiswano wenguqu owezwekazi leAfrica oweCAF Champions League.
Wonke lawa maqembu aphuma emazweni asenyakatho eyezwekazi lase Africa njalo umqeqetshi weqembu le FC Platinum uLizwe Sweswe uthi lokhu kutsho ukuba bazabe behamba imango emide kumncintiswano walonyaka.
“Akula qembu ebesingalikhetha ukuba ngabe yilo esidlale layo ngoba ziyafana zonke nje zintshantshu. Into nje mhlawumbe engasibulala zinhambo ezinde ngoba kukhatshana emazweni okumele siyedlala kuwo.
Okusalayo kodwa yikuba ibhola liyafana kuzamele sidlale njalo ngiyakholwa ukuba abafana bethu bazimisele kakhulu ukuthi sidlale okwedlula esikwenze emncintiswaneni owedluleyo,” kutsho uSweswe.
Emncintiswaneni owedluleyo iqembu le FC Platinum lenelise ukuthola imiklomelo emibili kuphela ngemva kokuba ngutshiki lobhanqa leqembu le Orlando Pirates emidlalweni emibili.
Kusibaya sika Group A kule Primeiro Agosto elase Angola, TP Mazembe eyase Democratic Republic of Congo, iZamalek yase Egypt kanye le Zesco eyakwele Zambia.
Kusibaya sika Group C kule USM Alger eyase Algeria, Mamelodi Sundowns eyakwele South Africa, iqembu le Petro Atletico elase Angola kanye lele Wydad Casablanca ele Morocco.
Kusibaya sika Group D kuleqembu le Raja Casablanca elakwele Morroco, JS Kabylie ele Algeria, AS Vita eye DRC kanye leqembu le Esperance ele Tunisia.
Kolunye udaba olumayelana lomdlalo wenguqu amaqembu adlala kusigaba se Castle Lager Premier Soccer League azadlala ngokulandelayo kulimpelaviki.
NgoMgqibelo iqembu le Black Rhinos lizemukela ele Chicken Inn eNational Sports Stadium, iqembu le Manica Diamonds lizangqikilana lele ZPC Kariba eVengere, iqembu le FC Platinum lizadibana lele Yadah ngase Mandava, iqembu le Ngezi Platinum Stars lizadlala lele Dynamos ngase Baobab kuthi iqembu le Harare City lizadlala lele Mushowani Stars ngase Rufaro.
NgeSonto iqembu le CAPS United lizemukela ele Hwange ngase National Sports Stadium, iqembu le Bulawayo Chiefs lizangqikilana lele Triangle ngase Luveve, iqembu le Chapungu lizadlala lele Herentals ngase Ascot Stadium kuthi iqembu le Highlanders lizadlala lele TelOne ngase Barbourfields.
