amalinks wokungena

Breaking News

UTrump Uthi amaDemocrats Azaqilibezela Kukhetho, Kodwa uBiden Uthi Akulanto Enjalo


U.S. President Donald Trump and Democratic presidential nominee Joe Biden participate in their first 2020 presidential campaign debate held on the campus of the Cleveland Clinic at Case Western Reserve University in Cleveland, Ohio, U.S., September 29, 20
U.S. President Donald Trump and Democratic presidential nominee Joe Biden participate in their first 2020 presidential campaign debate held on the campus of the Cleveland Clinic at Case Western Reserve University in Cleveland, Ohio, U.S., September 29, 20

UMongameli weMelika uMnu Donald Trump uthi ukhetho lukaMongameli oluzaqhutshwa mhlaka 3 ngoLwezi luzakuba lokuqilibezela okungakaze kubonakale embalini yalelilizwe.

UTrump ukhulume amazwi la kunkulumompikiswano ayenze lancintisana laye uMnu Joe Biden ngoLwesibili lapho ababili laba abangqikilane khona batshukana phezu kwezinto ezitshiyeneyo.

Uthe uBiden lebandla lakhe eliphikisayo elamaDemocrats bahlose ukuqilibezela kulolukhetho ngokuvumela abantu abanengi ukuvota ngeposo.

“Ukuvota ngeposo kulengxabangxoza. Ungacela wena ukuvota ngeposo kulungile kodwa okwenzakalayo yikuthi bathumela izigidi zabantu elizweni lonke ama-ballot papers,” kutsho uMongameli Trump.

“Kulokuqilibezela ngoba amanye ama-ballot papers atholakale egangeni njalo amanye alebizo lami atholakale egabheni lezibi. Kuzakuba lokuqilibezela okungakaze kubonakale elizweni leli kulolukhetho.”

UMnu Biden yena ukulandule lokhu wathi uhlelo lokuvota abantu bengekhaya babe sebethumeza amavoti abo ngeposo yinto evele ikhona kanti njalo akulabufakazo bokuthi kulokudlelezela kulolu hlelo.

“Umqondisi wakhe wogatsha lwendaba zasekhaya kanye lomqondisi weFBI sebekutshilo ukuthi akulabufakazi bokuthi ukuvota ngeposo kubangela ukuthi abantu baqilibezele kukhetho,” kutsho uBiden.

“Iqiniso yikuthi izigidi zabantu zizavota ngeposo njengaye utrump ngenxa yomkhuhlane wecovid-19. Akuzamayo yikwenqabela abantu ukuvota. Kumele livote ngobunengi.”

Ababili laba bathuzane njalo ngodaba lwabamhlophe abedlulise amalawulo abazonda abantu abamnyama uBiden wethesa uMnu Trump icala lokubandlulula abantu ngemihlobo.

UTrump ukulandule lokho kodwa uthe ephiwa ithuba ngumlawuli walinkulumompikiswano uCris Walace oyintathelizindaba ukuthi achothoze abamhlophe abazonda abantu abamnyama, kazange akwenze lokhu ngaphandle nje kokuthi kumele bame eceleni mbijana.

UMongameli Donald Trump etshukana loMnu Joe Biden kungxoxompikiswano enziwe ngoLwesibili ebusuku.
UMongameli Donald Trump etshukana loMnu Joe Biden kungxoxompikiswano enziwe ngoLwesibili ebusuku.

Baphinde badlephana njalo ngodaba lomkhuhlane weCovid-19 uBiden esithi uTrump uluphethe butshapha loludaba okubangele ukufa kwabantu abedlula 200,000.

Kodwa uTrump ukulandule lokho wathi alubana kunguBiden ophetheyo ngabe sokwaba izigidi lezigidi zabantu.

Ababili laba baphikisane njalo ngodaba lomnotho uBiden esithi uTrump usewubulele kodwa uTrump uthe umnotho uqhuba kuhle phansi kwakhe.

Bekulokuthukana okukhulu njalo nanku uBiden uchaza uTrump njengesitandari wathi ungumdlwane kaMongameli weleRussia uMnu Vladmir Putin.

UTrump yena uthe uBiden ngumuntu ongajulanga engqondweni owayehluleka lezifundo zakhe.

Abanye basole uTrump besithi wehluleke ukuziphatha kuhle kulimpikiswabo kodwa abanye labo basole uBiden ngokufanayo.

“Ngibona angani bafuna ukuthenga amehlo abantu ngokukhuluma ngezinto lezo abantu abafuna zilungiswe kodwa bengagxili ukuthi bazazilungisa njani,” kutsho isizalwane seZimbabwe esihlala eTexas uMnu Garry Thwala Jackson.

Sixoxe njalo lesinye isizalwane seZimbabwe esibukeleyo uMnu Tim Muringayi ohlala eOhio: “Ngibona angani uBiden ubebuya lama-points lama-facts njalo ukhanya angani wenze i-research yakhe kuhle,”

Ingcwethi ecubungula ezombusazwe uMnu Effie Dlela Ncube uthi lanxa bekulokufuthelana phakathi kukaTrump loBiden kukhona okungafundwa yiZimbabwe.

“Kungumzekeliso omuhle emazweni omhlaba anjengeZimbabwe ukuthi kasibeni lePresidential Debate kwelaseZimbabwe sibabeke abantu baphikisane phambi kwethu bonke ukuze sikhethe sesibonile ukuthi bazasenzelani,” kutsho uMnu Ncube.

Ababili laba basazongqikilana njalo kungxoxompikiswano ezimbili kunsukwana ezilandelayo.

Mhlaka 7 ngenyanga elandelayo khona umsekeli kaTrump uMnu Mike Pence lomsekeli kaBiden uNkosikazi Kamala Harris bazangqikilana kumpikiswano efanayo.

please wait

No media source currently available

0:00 0:04:29 0:00

XS
SM
MD
LG