UMongameli weMelika uMnu Donald Trump uthi usesiya enkantolo yeSupreme Court ngoba ibandla eliphikisayo elamaDemocrats lizama ukuqilibezela kukhetho olwenziwe izolo lanxa nje kungakaziwa ukuthi ngubani onqobileyo phakathi kwakhe loMnu Joe Biden.
Kumbiko asanda kuwethulela abasekeli bakhe, uTrump uthe usesiyacela iSupreme Court ukuthi ivimbe ukubalwa kwamavoti endaweni ezitshiyeneyo esithi kulokudleleza okwenzakalayo.
UTrump uthe ubenqoba endaweni ezitshiyeneyo ezifana leGoergia, kodwa okumangalisayo yikuthi ukubalwa kwamavoti kusuke kwamiswa nje kungelangcazelo.
Uthe lanxa kunjalo, uyakwazi ukuthi usenqobile kulolukhetho.
Engakethuli lumbiko kumabonakude, uTrump uqale wethula umbiko kuTwitter esithi ibandla, “Siyakhokhela ngebanga alikhulu, kodwa bazama ukuntshontsha ukhetho. Asisoze sibavumele. Amavoti kamelanga avunyelwe isikhathi sokuvota sesedlule.
UMnu Biden yena wethule owakhe umbiko phambilini kukaTrump esithi uzwa elethemba lokuthi uzanqoba kulolukhetho.
“Sizizwa sijabulile. Silethemba lokuthi sizanqoba kulolukhetho,” kutsho uMnu Biden.
Oyanqoba phakathi kukaBiden loTrump kumele athole ama-college votes angu270. Okwamanje uTgrump usethole angu213 kuthi uBiden yena usethole angu220.