Umkhokheli weMDC-T, uMnu. Morgan Tsvangirai ngoLwesihlanu ukhethe abasekeli bakhe ababili, uMnu. Nelson Chamisa loMnu. Elias Mudzuri.
Lokhu kutsho ukuthi uTsvangirai uselabasekeli abathathu abagoqela uNkosazana Thokozani Khuphe okade evele ekhona kuleso sikhundla.
Lelinyathelo libikwa lingemukelwanga ngabanye abakubandla leli abakhanya bemangaliswe yinani labasekeli bakamongameli abanengi kangaka ukwedlula leZanu PF elomkhuba onjalo.
UTsvangirai, yena ofunyenwe elomkhuhlane wemvukuzane yamathumbu, ubekhatshwe nguNkosikazi wakhe, uElizabeth, lapho esethula amagama abasekeli bakhe laba.
Umsekeli wakhe, uNkosazana Thokozani Khuphe, ubengekho emhlanganweni ophume lesinqumo sokuthi akhethe abasekeli laba ingoLwesine. Imizamo yokukhuluma loMaKhuphe yehlule.
Kodwa ilunga lebandla leli, uMnu. Peter Moyo uthi lelinyathelo liyancomeka.
Ukuhlaziya loludaba, uChris Gande uxoxe lengcwethi kwezombusazwe, uMnu. Brilliant Mhlanga yena othi inyathelo elithethwe nguTsvangirai kalilunga.