Kulokuvumelana phakathi kwabaphathintambo bakahulumende, inhlanganisi ezizimeleyo, ingcwethi kwezenotho labemele izifundi zemakolitshini ukuthi ibudget yomnyaka ka 2012 eyethulwe izolo ephalamende nguMnu. Tendai Biti ephalamende itshengisa ukuthi iZimbabwe ifuna ukuthuthukisa inotho kazulu loba nje ilizwe lingela mali.
Bathi kusobala ukuthi izandla zika Biti zimfitshane ngenxa yokuthi ibudget eyi US$4 billion iphelela kuholo lezisebenzi kuthi ke lokho okuseleyo kuthathwe zingatsha ezitshiyeneyo.
Umphathintambo wezisebenzi zika hulumende uNkosikazi Lucia Matibenga uthi kuyajabulisa okwenziwe nguMnu. Biti loba nje izisebenzi zifuna imali enengi yeholo.
Izifundi zemakolitshini lazo zijabule ngokuthi ukulumende ufuna ukuthi zithole izigidi ezingamatshumi amabili zamadola eMelika yokubhadalela imfundo.
Ingcwethi kwezenotho uMnu. Daniel Ndlela uthi imali le yizifundi lokunye okuphiwe ingatsha zikahulumende kutshengisa ukuthi imali enengi kahulumende izabhadala iholo lezisebenzi.
Umnu. Biti uphinde wathi ufuna kube lesikhwama sezigidi ezingamatshumi amabili samadola eMelika, iJobs Fund, sokuphandela uzulu imsebenzi. Abantu makhaza abafuna ukuvula amankampani bakhangelelwe ukuthi badinge imali le ebhanga le Stanbic.
Uphinde njalo wathi kumele kwenziwe isikhwama sokuthuthukisa inotho yabesifazane.
