Usibalukhulu webhanga elikhulu lelizwe iReserve Bank of Zimbabwe (RBZ) uMnu. Gideon Gono uthi abantu bayafuthelana ngokuthi balahlekelwa yimali enengi ngesikhathi ele Zimbabwe liqalisa ukusebenzisa imali zemazweni.
UGono utshele ikomithi yedale lephalamende ebona ngezemigodi ukuthi njengoba abantu bezondile ngokulahlekelwa yimali yabo sokumele umphathintambo wezemali uMnu. Tendai Biti adinge imali yokubabhadala lanxa ilizwe lithwele nzima ngokudinga imali yokuthuthukisa inotho.
UGono, owetheswa icala lokubhidliza inotho yelizwe, uthi ibhanga le RBZ alilamali yokuthi lincedisa uBiti ukuthi abhadale abantu makhaza lamankampani alahlekelwa yimali.
UBiti ubikwa wathi kwakufuneka izigidi eziyisithupha zamadola eMelika ukwenzela ukuthi kubhadalwe limali kodwa uhulumende wama ukwenza lokho njengoba abanye abantu basebeqongisa imali abalayo emabhanga ukwenzela ukuthi bathole imali ethe xaxa.
Kwacina sokufuneka phose izigidi ezingamatshumi amabili zamadola eMelika.
Ingcwethi kwezenotho zithi ele Zimbabwe kalenelisi ukubhadala limali. Eyinye yalezingcwethi uMnu. Masimba Kuchera uthi kumele uMnu. Gono akhulume enanzelela ngaloludaba oluhlupha uzulu ngoba nguye owabulala inotho yelizwe.
