Kulabanye abantu abasekela okufisa ukwenziwa libandla leMDC elikhokhelwa nguMnu. Nelson Chamisa elithi abalandeli balo bazatshengisela emigwaqweni kungacelwanga imvumo emapholiseni njengoba bevinjwa sonke isikhathi bengazama ukwenza lokhu.
Abanye kabakusekeli lokhu besithi kwephula imithetho yelizwe njalo akusoze kulungise okuhluphayo elizweni.
Abasekela ibandla leli bathi ukutshengisela okungekho emthethweni yikho okungaletha inguquko kwezombusazwe, ezokhetho lokunye abafisa kwenziwe eZimbabwe ukuze kubelohulumende kazulu lentuthuko.
UPashor Raphael Sibanda, okuhlangothi lwabatsha kubandla leli koBulawayo, uthi kunengi abafuna kwenziwe.
Uthi bakulindele konke okuzakwenziwa nguhulumende kaMongameli Emmerson Mnangagwa bengatshengisela emigwaqweni.
Kodwa isakhamuzi seKambuzuma, uMnu. Collins Ncube, uthi ibandla leMDC lidlala kubi ngoba abantu balakho ukukhahlanyezwa ngamapholisa ensitha aweCentral Intelligence Organization lamasotsha.
UNcube uthi lokhu kuzakwenza kubenzima ukuba kuphume okubambekayo phezu kokutshengisela emigwaqweni.
Kulabanye abasekela ukutshengisela emigwaqweni okungekho emthethweni. Omunye wabo nguMnu. Mbonisi Sibindi, ohlala eHarare.
USibindi ufisa ukuthi abantu abanengi basekele ibandla leMDC esithi ukutshengisela emigwaqweni kulakho ukuguqula indlela ilizwe elibuswa ngayo.
Osakhulayo, uTrevor Vimbelela, kavumelani lalokhu.
UMnu. Bekezela Gumbo, ingcwethi ecubungula ezombusazwe okunhlanganiso yeZimbabwe Democracy Institute, uthi kasikafiki isikhathi sokuthi uzulu labamabandla ezombusazwe aphikisayo bakhulume ngalizwi linye, baveze ukukhonona kwabo ngombuso kaMnangagwa.
samapholisa uSenior Assistant Commissioner Paul Nyathi uhle wakubeka sobala ukuba amapholisa kasoze abukele abalandeli bebandla leMDC besenza santango emigwaqweni. Uthi bazajeziswa abantu abephula umthetho.
Abezomvikela badubula abantu abambalwa nyakenye langomnyaka ka2018 kulandela ukutshengisela kwabantu emigwaqweni ababekhonona ngokukhuphulwa kwentengo yamafutha ezimota mahlayana njalo langokuphuza ukwethulwa kwempumelo yokhetho lukamongameli.
