amalinks wokungena

Breaking News

Uzulu, Inhlanganiso Ezizimele Zodwa Basola Ukutshaywa Kuka Douglas Coltart Ngamapholisa


Amapholisa abikwa ukuthi atshaye uDouglas Coltart oligqwetha ngesikhathi esenkambeni yamapholisa. REUTERS/Philimon Bulawayo

Inhlanganiso zamagqwetha, abamabandla ezombusazwe aphikisayo kanye lengcwethi kwezombusazwe ezibalisa eyalabo abalwela ilungelo loluntu eyeZimbabwe Lawyers for Human Rights (ZLHR), abamabandla ezombusazwe aphikisayo kanye lozulu jikelele basola ukutshaywa kukaMnu. Douglas Coltart ngamapholisa eHarare Central Police Station ngempelaviki.

UColtart, obemele ilunga lenhlanganiso yeAmalgamated Rural Teachers’ Union of Zimbabwe (ARTUZ) ngesikhathi etshaywa, uthi watshaywa ezama ukukhulula uMnu. Obert Masaraure, okhokhela inhlanganiso le.

Uthi akwaziwa okwenza ukuthi atshaywe ngamapholisa ezama ukumele umuntu okwakuthiwa ubedingwa ngamapholisa ambopha ezama ukutshengisa umkakhe indlela yokumisa imota emgwaqweni.

Eyinye yalezinhlanganiso etshengise ukukhathazeka okukhulu phezu kwalokhu okwenziwe ngamapholisa ngeye Zimbabwe Lawyers for human Rights (ZLHR) elamagqwetha amanengi amela uzulu.

Embikweni walenhlanganiso yeZLHR othunyelwe intathelizindaba, bathi lokhu kutshaywa lokuhlukunyezwa kuka Coltart akuqali namuhla ngoba wake wenziwa okufanayo ngesikhathi abenhlanganiso yeARTUZ besiyakwethula ingcwadi yabo yezikhalazo emawofisini omphathintambo wezemali lokuthuthukiswa komnotho welizwe, uProfessor Mthuli Ncube.

Bathi osekusenzakala kuyinto engalunganga ngoba sekufaka amagqwetha elizweni engozini nxa eqhuba umsebenzi njengalokho obekusenziwa nguColtart.

Ingcwethi kwezombusazwe ezibalisa, uMnu. Mlindelwa Mancitshana, laye usisole kakhulu lesi senzo samapholisa.

Lokhu kusekelwe ngeyinye njalo ingcwethi yezombusazwe ekunhlanganiso yeZimbabwe Democracy Institute, uMnu. Bekezela Gumbo.

Abamabandla ezombusazwe abalisa ele Movement for Democratic Change elikhokhelwa nguMnu. Nelson Chamisal labo basisole kakhulu lesi sehlakalo.

Isakhamuzi seWaterfalls eHarare, uMnu. Collins Ncube, uthi kuyayangisa okwenziwe ngamapholisa.

Lumsakazo awenelisanga ukukhulumisana labakuhlangothi labasesipholiseni lwezokukhulumisana lozulu ukuzwa ucele labo phezu kwaloludaba.

Facebook Forum

XS
SM
MD
LG