Amabandla aphikisayo athi eleZimbabwe kumele lifunde okunengi kundlela eleZambia eliqhube ngayo ukhetho.
UMongameli Edgar Lungu unqotshwe ngamavoti ayisigidi kulolokhetho ngumholi webandla eliphikisayo uMnu Hakainde Hichilema wavuma ukuqhubela uHichilema intando zombuso.
Lokhu kujabulise abanengi eZimbabwe abagoqela abebandla leMDC Alliance bona abathi ukhetho oluzayo kumele luqhutshwe ngendlela esuthisayo kungelakuqilibezela.
Bathi njalo abayabe benqotshiwe, ikakhulu abasembusweni, kuzamele bavume ukusuka esihlalweni njengoMongameli Lungu.
Isikhulumeli sebandla leZapu uMnu Iphithule Maphosa utshele iStudio 7 ukuthi kunengi okumele kufundwe yiZimbabwe kukhetho lweZambia.
Kusenjalo, ingcwethi kwezenotho zithi ikusasa leZambia likhanya likhazimula phansi kombuso kaHichilima.
Kuthe sokusobala ukuthi uMongameli Lungu ungqotshiwe, isisindo semali yeZambia, iKwacha, sibikwa sikhwelile.
Intathelizindaba yeZimbabwe ehlala eLusaka, kweleZambia, uVusumuzi Sifile Sibanda utshele iStudio 7 ukuthi abanengi balethemba lokuthi umnotho uzavuka njengokuthembisa kukaMongameli omutsha.