Uzulu uthukuthele ngembiko ethi kuleziphathamandla zikahulumende kanye lamalunga edale lephalamende angafuni ukubhadala izikwelede zemithelo yomlilo kagetsi kunkampani ye Zimbabwe Electricity Supply Authority (ZESA).
Uzulu uthi okumangalisayo yikuthi nxa abaswelayo bengehluleka ukubhadala amatshumi amane amadollar kuphela yomlilo kagetsi iZESA ihle ibavalele umlilo ezindlini ngokuphangisa kodwa ke iziphathamandla zikahulumende ezilezikhwelede zenkulungwane ezingamatshumi amabili amadollar kusiya kunkulungwane ezedlula ikhulu-$20,000 - $100,000 zixolelwa.
Iziphathamandla lezi ezigoqela usibalukhulu wesabelo seManicaland uMnu. Christopher Mushowe zibikwa zisebenzisa amandla eziwatholiswa yizikhundla zazo ekuxotsheni izithunywa zenkampani yeZESA eziyabe zilande ukuzocitsha ugetsi emizini yazo ngenxa yokungabhadaleli umlilo lo.
Inkampani ye ZESA ibikwa ilakho ukucitshelwa umlilo kagetsi ewuthola eMozambique ngenxa yokungabhadali isikhwelede sezigidi phose ezilikhulu zamadollar eMelika-$90million..
Isakhamuzi sako Bulawayo uMnu. Clemency Sibanda uthi okwenziwa yiziphathamandla lezi kuyayangisa.
Umnu. Thandeko Zinti Mnkandla omele iGwanda North edale lephalamende uthi iziphathamandla lezi labanye babo ababusayo kababhadali umlilo kagetsi ngenxa yokuthi kabagobekanga.
Uzulu Uthi Kumele Iziphathamandla Zikahulumende Zibhadale Izikhwelede zeZESA Ngenkani
- Gibbs Dube
