Uzulu usamukele ngokuthokoza ukubambana izandla okwenziwe yinkokheli yamabandla aphikisayo edolobheni le Gweru lapho ibandla leMDC-T elingene ezitaladeni litshengisela lincedisana lebandla le Zimbabwe People First. UMnu. Morgan Tsvangirai ubambane izandla loNkosikazi Joice Mujuru bahamba bazebayakhuluma emhlanganweni munye.
Lanxa bekhona abakhonona ngesehlakalo lesi ukuhlolisisa okwenziwe yi Studio Seven kutshengisa ukuthi balutshwana ngoba inengi lisithi kumele amabandla aphikisayo wonke amanyane.
UChris Gande weStudio Seven uxoxe lesikhulumeli se Zimbabwe People First, uMnu. Rugare Gumbo othi mpela kumele kusetshenzelwane.
“Okukhona yikuthi amabandla wonke siyakhuluma ukuze sibone ukuthi sizakwenzanjani njengoba ieconomy yethu isiya phansi,” kutsho uGumbo.
UChris Gande uphinde waxoxa lomsekeli wesikhulumeli sebandla leMDC-T, uNkosazana Thabitha Khumalo laye ovumelana lenyathelo leli.
“Ukubambana kwethu abebandla leMDC-T ekhokhelwa nguMnu. Morgan Tsvangirai lele Zimbabwe People First kutshengisa ukuthi siyalalela okukhulunywa nguzulu,” kutsho uKhumalo.
Ukuhlaziya loludaba, uChris Gande uxoxe lengcwethi ecubungula ezombusazwe, uMnu. Ambrose Sibindi ukuze sizwe imbono yakhe.
“Esingakutsho yikuthi kuyinto enhle okwenzakala eZimbabwe kathei ngoba amabandla la engahlala eyibuqqmuqamu kusobala ukuthi kuzakubanzima ukususa ibandla leZanu PF esihlalweni,” kutsho uSibindi.