Inkulungwane lenkulungwane zabantu zibe zithe gwaqa eBulawayo City Hall ngolweSihlanu zivalelisa uNkosikazi Thenjiwe Lesabe obhubhe ngoLwesihlanu lweviki edluleyo.
Intathelizindaba yethu uMzenzi Tshabangu ubika obesembuthanweni womthandazo wokuvalelisa uMaKhumalo uthi umuyi ungcwatshwa ngoMgqibelo emzini wakhe eFort Rixon.
Ekhuluma embuthanweni we City Hall, umkhokheli we ZAPU uMnu. Dumiso Dabengwa uthe ibandla lakhe alizange lizihluphhe ngokuya ebandleni leZanu PF ukuya cela ukuthi umuyi aphiwe inhlonipho yeqhawe lesizwe ngoba bekwazi ukuba bebe vele bezakwala njalo akubahluphi ukuthi umuyi akazukubekwa eNational Heroes Acre. Uqhubeke wathi iZAPU ilomcabango wokucela ukuphanda amangcwaba abantu bonke be ZAPU abalele eNational Heroes Acre nxa ibandla le ZANU-PF lingaqhubeka lisala ukuthi ababhubhayo bengabe bandla leZAPU bengwcwatshwe khona bona besazakala ukuba basebenza impilo yabo yonke ukulwela inkululeko yaleli lizwe.
Isikhulumeli se ZAPU uMnumzana Methuseli Moyo uthe loba abantu kade bedabukile emphefumulweni ngokubhubha kuka MaKhumalo, bamvalelise ngendlela ehloniphekayo.
Umfundisi Ginya we African Methodist Church nguye owethule inkonzo yokuvalelisa umuyi etshiye abanengi bewohloka izinyembezi.
