amalinks wokungena

Abantu Bakhala Ngabonozinti Beqembu Lama Warriors

  • Joseph Njanji

Warriors fans

Uluhlu lwabadlali abangamatshumi amabili lantathu ababumba iqembu elizakuyamela ilizwe kumidlalo yalonyaka eye Africa Cup of Nations lwethulwe emphakathini ngoLwesine njalo abalandeli bomdlalo wenguqu abakhulume lomsakazo weStudio 7 baveze imibono eyehlukeneyo phezu kwaleliqembu.

Abadlali baphakathi kwenkundla inengi labalandeli livumelane ukuba abanengi babo bafanele ukuba yingxenye yeqembu lesizwe kodwa insolo ikubonozinti lapho okukhethwe khona uTatenda Mukuruva odlalela iqembu le Dynamos, uTakabva Mawaya oweqembu le ZPC Kariba kanye lo Donovan Bernard obambela iqembu le How Mine.

Intathelizindaba esebenzela edolobheni lako Bulawayo uNation Ndlovu ukhala ngokuba esangweni yikho lapho okungavela khona inkinga ngoba engabakholwa onozinti abakhethiweyo

“Kubonozinti yikho lapho engikhala ngakho kakhulu. Singakhangela umdlali onjengo Petros Mhari odlalela iqembu le FC Platinum udlale kuhle kakhulu lonyaka waze wakhethwa ukuba nguye yedwa unozinti ongene kukhalenda yama Soccer Stars.

“Kwelinye icele ungakhangela uTakabva Mawaya yebo ubebamba kodwa kafiki kuMhari kuthi uDonovan Bernard yena uvele ubengadlali kuqembu lakhe le How Mine, uTatenda Mukuruva njengaye nxa engafika ebambe khonale eAfrica amabhola emoyeni azangena azaba manengi kakhulu. Yikho ke mina bengikhangelele umdlali onjengo Mhari loba uTapuwa Kapini loba esekhulile kodwa udlala kuhle elizweni le South Africa.”

Abaqeqetshi beqembu lesizwe bakhethe abagadli abayisikhombisa okuyinto uLungelo Matshazi athe ingabajikela nxa bengalinyalelwa ngabadlali benkabeni yenkundla.

“Ngowami umbono ngibona angathi ama strikers asuke aba manengi kakhulu ngaba kwandiswe ama defensive midfielders. Labadlali bethu bafitshane nxa uqathanisa labamaqembu esizadlala lawo okokuthi imvimbi zethu ezibalisa uHardlife Zvirekwi labo Onismor Bhasera bengathawala nzima kodwa bona abadlali abakhethiweyo kabasolisi kangako.”

Indaba yabadlali abafitshane iphathwe njalo nguZwelibanzi Nyathi othe onozinti bekufunakala othwayithwayi ngoba kulaba abathathu abakhethiweyo uMawaya nguye kuphela omude.

“Kukhanya sigijimise ubutsha ekukhethweni kwabonozinti kodwa isifiso sami besingesokuthi ngabe sihambe lonozinti omude onjengo George Chigova kuthi abafana abancane laba befunde behlezi phandle kodwa kungasenani sebezafunda bevele sebephakathi.”

Abadlali abakhethwe ukuyamela ilizwe le Zimbabwe lona eliku sibaya sika Group B ndawonye le Senegal, Algeria kanye le Tunisia ngababalisa onozinti abathi uTatenda Mkuruva, uDonovan Bernard kanye loTakabva Mawaya.

Imvimbi kulo Hardlife Zvirekwi, uOscar Machapa, uOnismor Bhasera, uBruce Kangwa, uLawrence Mhlanga, uTeenage Hadebe, uCosta Nhamoinesu kanye lo Elisha Muroiwa.

Abadlali benkabeni yenkundla kulo Willard Katsande, uDanny Phiri, uKuda Mahachi, uMarvelous Nakamba kanye lo Tino Kadewere.

Abagadli kulo Khama Billiat, uCuthbert Malajila, uEvans Rusike, uMathew Rusike, uNyasha Mushekwi kanye lo Tendai Ndoro.

XS
SM
MD
LG