amalinks wokungena

Breaking News

Abantu Bazondiswa Yimizamo Kahulumende Yokubavimba Enkundleni Zokukhulumisana


Ukuba khona kwendlela ezinengi zokukhulumisana zakulezi nsuku ezinjengabo WhatsApp, Twitter, Facebook, Instagram lezinye ezilula ukusetshenziswa ngontanga, sezisenza kube lula ebantwini base Zimbabwe ukuthe benelise ukuxoxa lezihlobo labangane phakathi kwelizwe lakwamanye amazwe.

Ukusetshenziswa kwalezindlela, ukuphatheka kwezokuguqulwa kwemibuso emazweni abalisa kubo Tunisia, kunikeze ezinye izizalwane isibindi sokuzama ukuyisebenzisa ngendlela efanayo eZimbabwe.

Izibonelo zalokhu, yindlela uhulumende lozulu elizweni amukela ngayo imibiko yama video ebithunyelwa nguMfundisi Evan Mawarire, womkhankaso we #This Flag, lapho abekhalaza khona ngesimo sezomnotho.

Uhulumende akazange akujabulele lokho kwamenza waqalisa ukukhuluma ngezokwethula imithetho elukhuni ebalisa osalolongwa okwamanje oweComputer Crime and Cyber Bill, ojonge ukubeka imigoqo kwezokusetshenziswa kwalezindlela.

UMnu. Ostallos Gift Siziba, osakhulayo okhankasela amalungelo oluntu kanye lezokutholiswa amathuba wokutsho imibono yakhe uzulu, uthi kumele uhulumende amukela ngezandla zombili lezi ndlela zokwethula imibono alungisise amaphutha akhe ngokuphathelane lobudlelwano bakhe labantu ngoba kuyisibonelo sokuthuthuka kwesizwe.

UMfundisi Evan Mawarire ucatshangelwa ukuthi usebenzisa ubulembu bokuziibazisa ukwenzela ukuthi uzulu ahlamukele uhulumende. Uyakukhipa lokhu esithi ilizwe selibhidlika.
UMfundisi Evan Mawarire ucatshangelwa ukuthi usebenzisa ubulembu bokuziibazisa ukwenzela ukuthi uzulu ahlamukele uhulumende. Uyakukhipa lokhu esithi ilizwe selibhidlika.

Lokhu kusekelwa nguNkosazana Kholiwe Majama, obona ngezokuhlelwa kwenhlelo kunhlananiso yeMedia Institute of Zimbabwe kuhlangothi lwezokusetshenziswa kwemitshina yakulezinsuku kanye lezokusakaza eye ICT and Broadcasting.

Ngomunye wabasanda kungena umhlangano we Forum on Freedom on Internet Freedom in Africa, obizwe ngabe Collaboration for Internet Policy Policy in the East and Southern Africa (CIPESA) kwele South Africa.

Injongo yenhlanganiso ye CIPESA yikukhankasela ukuthi kube lemitthetho evumela ukusetshenziswa kwendlela zokukhulumisana zakulezi nsuku.

Ukhuthaza uzulu ukuba awazi amalungelo akhe sikhathi sonke ukwenzela ukuthi azivikele nxa ethe ephulwa.

Omunye wabasebenzelana labamankampani yemitshina le eye Information Technology, uMnu. Philani Majama utshengise ukukhathazeka ngalelinyathelo uhulumende asefuna ukulithatha.

UMajama uxwayise uzulu ukuthi alimuke ekusebenziseni lezindlela zokukhulumisana zakulezinsuku, lapho ethumela imibiko yakhe.

Uthi ulethemba lokuba akuyikufana lalokho okwenzakala kwamanye amazwe afana lele China lapho uzulu enganelisi ukusebenzisa ezinye zalezindlela zokukhulumisana ngoba uhulumende wakhona esesaba ukuvukelwa ngabantu bakhe.

Okwamanje uhulumende uphakathi kokudinga indlela zokufakela abantu imigoqo ekusetshenzisweni inkundla zokuzilibazisa ezitshiyeneyo esithi okunye okuhlafuna kulezonkundla kwenza ukuthi abantu bamhlamukele.

please wait

No media source currently available

0:00 0:06:59 0:00
XS
SM
MD
LG