Abantu bemadolobheni amanengi eZimbabwe babikwa besehluleka ukuthatha imali yabo emabhanga atshiyeneyo ngenxa yokuthi iyasilela.
Uzulu ubikwa esehluleka ukuthola imali emabhanga anjengeZimbabwe Banking Corporation, People’s Own Savings Bank (POSB) le Agribank eHarare, eMasvingo, Marondera kanye le Mutare. inengi belinikwa imali eyingcosana kwamanye amabhanga la kuthi-ke kwamanye iphelile ngenxa yokwandelwa yilabo abayifunayo abanjenge zisebenzi zikahulumende ezithole amabhonasi lonyaka.
Kwezinye indawo ezinjenge Masvingo abakade behluphana labebhanga le Agribank befuna imali zabo bacine bebizelwa amapholisa.
Abamele amabhanga abe Bankers Association of Zimbabwe bathi ilizwe lilemali eyeneleyo yokunika uzulu ngesikhathi sekhisimusi.
Kodwa-ke uMmnu. Sifiso Ndlovu omele inhlanganiso ye Zimbabwe Teachers Association othwele nzima ngokudinga imali ebhanga uthe kusobala ukuthi imali kayikho kwamanye amabhanga.
Ingcwethi kwezenotho uMmnu. Masimba Kuchera uthe amabhanga kumele abe lamaqhinga ajulileyo wokwenzela ukuthi uzulu athole imali ngesikhathi sonke sekhisimusi.
