Uzulu weMelika usemelele impumela yokhetho lukaMongameli ngemva kokuvota ngobunengi izolo ekhetha phakathi kukaMnu Donald Trump, onguMongameli okwamanje, loMnu Joe Biden.
Kumpumela esiveziwe uMnu Biden usenqobe ezabelweni ezifana leColorado, Carlifonia, New York, Vermont, Delaware, Maryland, New Jersey, Massachussets, Washington State, Washington DC leNew Mexico.
Ukuze umuntu anqobe kukhetho lukaMongameli weMelika kumele athole amavoti ezabelo angamakhulu amabili lamatshumi ayisikhombisa, 270.
Umsakazo weVoice of America uthi okwamanje uBiden usethole ama-college coves angamakhulu amabili lanhlanu, 205.
UMongameli Trump yena usethole alikhulu, 100, njalo usenqobe ezabelweni ezifana leUtah, Wyoming, North Dakota, South Dakota, Nebraska, Kansas, Oklahoma, Missouri, Arkansas, Tennesse, South Carolia, Indiana, Kentucky, Alabama leWest Virginia.
Impumela yamalunga edale lecongress layo isiqalisile ukwethulwa.
Umsekeli kaBiden uMnu Den Moyo utshele iStudio 7 ukuthi lanxa umango usasemude ukuthi kwaziwe ukuthi ngubani onqobileyo, ubona angani uBiden uzanqoba.
Umsekeli kaMongameli Trump uMnu Garry Thwala Jackson yena uthi lanxa efisa ukuthi uTrump anqobe, akukakhanyi ukuthi ngubani ingqwele kulolukhetho.
