amalinks wokungena

Breaking News

Kuxotshwa Abathengisa Ngokungekho Emthethweni Ezitaladini zeHarare


Abaphila ngokuthengisa eCopacabana

Kuqale ngalabo abathengisela bucwadlana lamahofisi ekhansili abalisa awe Cleveland House le Town House.

Abaphila ngokuthengisa ezitaladeni edolobheni leHarare bemba phansi bethi kabayindawo lanxa umanisipala esungule uhlelo lokubasusa phakathi kwedolobha, ngoLwesithathu ekuseni, eqala ngalabo abathengisela bucwadlana lamahofisi akhe abalisa awe Cleveland House le Town House.

Kuvuke umsindo phakathi kwamaqembu amabili, abaphila ngokuthengisa ezitaladeni laba, ubangelwa yikuba umanisipala ethe basuke lapho abasebenzela khona, abathengisa impahla bucwadlana lamahofisi esigodlo sakhe awe Town House kanye lawe Cleveland House, bayethengisela lapho bekuvele kulabathengisela khona izithelo esilindweni samabhasi eCopacabana Bus Terminus.

Abakade besebenzela emgwaqweni uLeopold Takawira, bathole sebedilizelwe indawo, ngokusa kwalamuhla, amapholisa kamanisipala ezigombolozele evimba ongafuna ukuthengisela kizo.

Amapholisa ohlangothi lwe Riot lawo abekhona lanxa engekho otshayiweyo loba ukuhlukuluzwa kulabo abekade behluphana bebanga indawo.

Isikhulumeli sikamanisipala, umnumzana Michael Chideme, utshele intathelizindaba ukuba akusela kubuyela muva kuloluhlelo lokususwa kwabaphila ngokuthengisa ukuze baye kulezo ezalungiselwa lokho.

Kodwa uzulu uthi angeke aya lapho kungakalungiswa khona, zingekho izambuzi lezakhiwo zokuthengisela, kusese lubhuqu nje, kuze kuthi umanisipala ekulungisisile lokho.

Omunye wabaphila ngokuthengisa, ongathandanga ukubethwa ngegama usisolile lesi senzo sikamanisipala.

Usola lendlela esetshenziswa ngumanisipala, ukubakhuthaza ukuba baye endaweni ezingakalungeli ukusebenzela kizo.

Inhlanganiso ezimela abathengisa ezitaladeni laba zisole kakhulu lesi senzo sikamanisipala sokuvukela uzulu ozama ukuziphilisa, endaweni yokuqala kulungisiswe lokho okumele kulungisiswe kuqala anduba basuswe edolobheni.

Umqondisi wenhlanganiso ye Unemployed Mobile Youth Foundation umnumzana Peter Jack utshele intathelizindaba ukuba akukho emthethweni lokho osekusenziwa ngumanisipala.

Okusekelwe ngumgcinisihlalo wenhlanganiso ye Nehanda Vendors Association, umnumzana Keith Charumbira oveze ukuba lindlela esithathwa yiziphathamandla zikamanisipala ingayisiyo okumele ilandelwe.

UCharumbira ukhuthaze umanisipala ukuba akhulumisane lozulu lenhlanganiso ezimela abaphila ngokuthengisa, kubonisanwe ngendlela ezingalandelwa ukululungisisa loludaba hatshi ukuhlukuluzana.

Inkokheli enhlanganisweni ye Zimbabwe Informal Sectors’ Organisations layo ilisole kakhulu lelinyathelo likamanisipala,lokubamba ngamandla uzulu ukuba aye kusebenzela kulezondawo ezintsha lanxa zingakulungeli lokho.

Umqondisi walenhlanganiso yeZISO,umnumzana Promise Mkhwananzi uthi amalunga kasoze asuka kulezo ndawo ethi lalokho osekusenzakala sekuphambana lobekutshiwo ngumanisipala sonke lesi sikhathi,

Wasola njalo inkulumo kamphathintambo wentuthuko yamadolobho osanda kubekwa kuleso sikhundla, umnumzana Saviour Kasukuwere, othi kumele umanisipala aphange asuse abathengisa emigwaqweni laba ngoba bengcolisa amadolobho.

Uzulu uthi asintando yakhe ukuba abe emsebenzini wokuthengisa ezitaladeni ngoba kungela ngenye indlela ethi ngabe leyo misebenzi eyathenjiswayo ingatholakala, kungabasiza ukuba bayesebenza ukuselela imhuli zabo.

Inengi lalabo abaliswe ukuthengisa ngosuku lwalamuhla bathi kabayikuya kulezo ndawo lapho kuthiwa baye khona ngoba zikhatshana lalapho kwanda khona abathengi kanye lokuba zingekho izakhiwo ezifaneleyo kizo okufuna lezambuzi.

Kusenjalo, inhlanganiso ezizimeleyo kanye lezilwela amalungelo abathengisayo ziqhube umhlangano wesiphange-phange ngoLwesithathu eHarare lapho ezibumbe khona umanyano ozaphikisa ukuxotshwa kwabathengisa ngokungekho emthethweni ezitaladini.

UMnu. Marvellous Khumalo, umqondisi wenhlanganiso elwela amalungelo ezakhamizi zeChitungwiza iChitungwiza Residents Trust, obekulo umhlangano uthi umanyano lo uzatshengisela ezitaladini njalo umangalele uhulumende emthethwandaba ngaloludaba.

XS
SM
MD
LG