Isikhulumeli somanyano weMDC Alliance uMnu. Welshman Ncube ukhuthaze abantu be Vumbachikwe Mine eGwanda ukuthi bevotele uMnu. Nelson Chamisa kukhetho oluzayo ngoba ibandla leZANU PF selehlulekile ukulungisa okumqoka okuhluphayo elizweni, okugoqela ukuswelakala kwemali.
Uphinde wethesa umongameli Mnangagwa, yena okhokhela ibandla leZANU PF, umlandu wokuphatheka kumbhuqazwe we Gukuranhundi.
Ekhuluma ebulenjini be twitter ngeSonto ntambama, uMnu. Ncube uthe ubekhatshwe yiziphathamandla zomanyano we MDC Alliance, ezigoqela uNkosazana Thabitha Khumalo lo Rita Ndlovu, uNkosikazi Nomathemba Ndlovu lo Sakhile Masuku kanye laboMnumzana Mathula Lusinga, Discent Bajila, Pharoah Jele, Oscar Ncube, lo Mqabuko Ndlovu. Bebexhasa uMnu. Patrick dube okhankasa kukhetho lokudinga ozamela iGwanda Central edale lephalamende. Asizweni amanye amazwi kaMnu. Welshman Ncube.
Kolunye udaba, kwabancintisa kukhetho intathelizindaba yethu uMavis Gama, uxoxa loMnu. Devine Mhambi Hove, umkhokheli webandla le National Alliance of Patriotic and Democratic Republicans – APPDR oncintisa kukhetho lokudinga umongameli welizwe.
Kusenjalo, uNkosikazi Lucia Matibenga okhokhela elinye icele le People’s Democratic Party, i-PDP, njalo eyisiphathamandla somanyano wePeople's Rainbow Coalition okhokhelwa nguNkosikazi Joyce Mujuru usichasisela ngamalungiselelo abo okhetho.