Owayengumsekeli kamongameli, uMnu. Phelekezela Mphoko, ulokhe elindwe ngamapholisa eZimbabwe njalo uthola iholo ayevele elihola.
Igqwetha lakhe, uMnu. Welshman Ncube, ongumkhokheli welinye lamacele eMovement for Democratic Change, utshele umsakazo weVOA Studio 7 ukuthi uMphoko waya emthethwandaba ukuthi aphiwe imfanelo zakhe ngokugcweleyo hatshi ukuthi uvele engatholi lutho.
UMphoko watshiya isikhundla sakhe ngemva kokususwa esihlalweni okwenziwa owayengumongameli, uMnu. Robert Mugabe nyakenye.
UMphoko wayengekho elizweni lokhu kusenzakala ese Japan ngomsebenzi. Kodwa ekuphendukeni kwakhe waphephela kwele Botswana ngesikhathi ibandla leZanu PF lisenza umhlangano we Extra Oridinary Congress owathatha isinqumo sokuthi kasuswe esikhundleni.
Kodwa ngokuya kwesikhathi wabuyela elizweni.
UNcube uthi: “UMphoko waya emthethwandaba ekhumbuza uhulumende ukuthi ulelungelo phansi kwesisekelo sombuso welizwe …. Kubhaliwe khona lapho ukuthi umuntu okade engunongameli kumbe umsekeli kamongameli kumele abe lomholo olingana lowomsekeli kamongameli ngaleso sikhathi ephiwa ipentsheni,” kutsho uNcube.
Uthi okungalotshwanga kusisekelo sombuso, okuyikho okudingwa nguMphoko, yimali yokwethekelela amanye amazwe, eyokwelatshwa lokunye okunjalo.
