Inhlanganiso ebona ngezempilakahle emhlabeni jikelele eyeWorld Health Organization (WHO) yethule isinqumo ngoLwesine ntambama esokuthi igcikwane le coronavirus eliqhamuke kumaviki ambalwa edluleyo eChina ludaba okufanele luqatshelwe ngamazwe wonke ngesiphange-phange, i-global health emergency.
Ekhuluma lentathelizindaba ngoLwesine, umqondisi weW-H-O UMnu. Tedros Adhanom Ghebreyesus uthe isimemezelo lesi sizancedisa ukuthi amazwe omhlaba athole uncedo oluphuthumayo olokulwisana laleligcikwane, njalo enqabele ukumemetheka kwalo.
I W-H-O ithi igcikwane leli selihlasele abantu abazinkulungwane eziyisitshiyagalombili lamakhulu amabili; 8,200-emhlabeni jikelele.
I coronavirus iqhamuke kweleChina kumaviki asanda ukwedlula njalo selibulele izizalwane zakulelolizwe eziphezu kwekhulu lamatshumi ayisikhombisa, 170.
Kusenjalo, ugatsha lwezempilakahle kweleZimbabwe luthi luqaphele abantu abaphose bafike ikhulu elilamatshumi amathathu, 130, asebeke bethekelela emazweni ahlaselwe yiCoronavirus, ukuze lube lesiqiniseko sokuthi abalalo lelogcikwane.
I coronavirus isabalele yafika emazweni angamatshumi amabili lambili agoqela eleMelika, Canada, Germany, France, Australia, Finland lamanye. Kodwa awukafiki emazweni aseAfrica.
Lanxa kunjalo, ugatsha lwezempilakahle eZimbabwe luthi luzahlolisisa abavela amazweni alomkhuhlane lo okwesikhathi esithile ukuze kuthathwe amanyathelo nxa ekhona othe watholakala elalo.
Luthi izisebenzi zempilakahle zethekelela abantu laba ezindlini zabo insuku zonke ukuyabahlola.
Izibonakaliso zokuthi umuntu usehlaselwe yileligcikwane zigoqela ukuvimbana, ukukhwehlela lokwehluleka ukuphefumula kuhle.
Umgcinisihlalo wenhlanganiso yeBulawayo Progressive Residents Association uMnu Ambrose Sibindi uthi ngokusilela kwemithi ezibhedlela, kungaba lomonakalo omkhulu kakhulu nxa i coronavirus ingaqhamuka eZimbabwe.
