Ngesikhathi umhlaba ulungiselela umkhosi wokunanza usuku lokuhlonipha amalungelo abesifazana owe International Women’s Day ngoMgqibelo ozayo, amanye amalunga edale lephalamende elizweni athi kufanele uhulumende abeke lelilanga ukuthi libe likhefu, ngendlela yokunanza imisebenzi emihle eyenziwa ngabesifazana ukuthuthukisa ilizwe.
Ilunga ledale lephalamende uNkosazana Thokozani Khuphe, nguye owethule loludaba kulelidale njalo wasekelwa linengi labanye bakhe. Kodwa amanye amalunga alelidale athe lokhu kungabuyisela umnotho welizwe emuva ngoba kuyabe kungasasetshenzwa ngalelolanga.
Omela iBulawayo East kulelidale, uNkosazana Thabitha Khumalo, utshele uSithandekile Mhlanga weStudio 7 ukuthi ilanga leli alisoze libe likhefu-nje kuphela kodwa minengi imicimbi-cimbi engenziwa ngalo.
