Amankampani angabayisilinganiso esingamatshumi ayisikhombisa lane ekhulwini, 74 percent, angaba esebunzimeni ngenxa yokuncintisana lamabhizimusi abaphila ngokuzisebenza lamabhizimusi amancane, kutsho impumela yocwaningo olwethulwe libhanga le World Bank.
Lelibhanga, kucwaningo oluthiwa 'Zimbabwe 2017 Profile', ngeSilungu, liveze ukuba amankampani amakhulu asethathelwa ibhizimusi ngamancane, amanye angabhaliswanga kuhulumende agoqela abaphila ngokuthenga bethengisa impahla etshiyeneyo.
"Amankampani amancane alakho ukuthathela ibhizimusi amakhulu ngoba esebenzisa indlela ezingenelisa ukuthi bathole inzuzo kulamabhizimusi amakhulu," kutsho ibhanga le World Bank
Sixoxe lesiphathamandla senhlanganiso elwela abaphila ngokuthengisa ezitaladeni, iZimbabwe Upcoming Traders’ Association, uMnu. Dumisani Ncube, othi lanxa kunjalo udubo lokusilela kwemali luphazamisa amabhizimusi abo.
"Eish, kuyabahlasela kakhulu ukusilela kwemali emabhanga ngoba inengi labo lifuna imali yokuthenga impahla esinye isikhathi phandle kwelizwe," kutsho uNcube.
