amalinks wokungena

Breaking News

Woza Friday: Liviki Silogwalo Lwenkondlo Olulotshwe "Ngabalobi Bakithi"


Ugwalo olutsha "Sigiya Ngolwethu" olulotshwe ngabazibiza ngokuthi Abalobi Bakithi

Kuhlandla le Woza Friday liviki siphethe ugwalo olutsha lwenkondlo olulotshwe ngabazibiza ngegama lokuthi, Abalobi Bakithi.

Imbongi ezingamatshumi amane ezilobe lolugwalo olulesihloko esithi, "Sigiya Ngolwethu", zithi injongo yalo esemqoka yikubuyisela isizotha lenhlonipho olimini lweSindebele.

Inhlanganiso yaBalobi Bakithi ibunjwe ngo 2013 ngenjongo yokuvuselela lokuqinisa amasiko lolimi lweSiNdebele. Ngomnyaka ofanayo abalobi laba bethule ugwalo olulesihloko esithi "Izigigaba Zakondonga Ziyaduma".

Lonyakake sebethule ugwalo lwabo lwesibili olumumethe inkondlo phansi kwesihloko esithi "Sigiya Ngolwethu".

Umngcinisihlalo wenhlanganiso yaBalobi Bakithi njalo eyimbongi eyaziwayo UBongani Ncube, uthi inkondlo ezikulolugwalo luluju oludliwa umuntu ebotshelwe. Inkondlo yakhele ethi uThando iyakufakaza lokhu akutshoyo.

Bangamatshumi amane abalobi ababhale inkondlo kulolugwalo olulamakhasi angamakhulu amathathu.

UZenzele Nkomo odabuka eKezi eMaphisa ngomunye wabalobi abalenkondlo zabo kulolugwalo. Yenake enkundleni uzalale ethi iSimanje. Laphake uthi isimanjemanje sesiwafake engozini amasiko omdabu.

UBrian Tshuma, insizwa yakoGala ePlumtree, yenake nguye obhalele ethi ziqoqeni. Ithike linsizwa ukuziqoqa umuntu aqoqeke yikho okuqoqekileyo.

Okhokhela laba balobi uBongani Ncube uthi njengoba ugwalo lwabo lwakuqala luthengwa okwamakukisi ebusika, kabathandabuzi ukuthi lalolu olwenkondlo luzathandeka ngendlela eyisimanga. Uthi lolugwalo luzakwethulwa ngokusemthethweni mhlaka 11 October e-Hillbrow Recreation Centre, kantike unxusa wonke osazigqaja ngolimi lwakhe ukuthi abekhona. Unxusa njalo abanye abalobi besintwini abalokhu besagoqe izandla ukuthi labo beze babeyingxenye yale inhlanganiso.

UBongani uthi injongo esemqoka kibo yikuthi abalobi benelise ukuziphilisa ngokuloba kwabo okuyinto athi idinga uxhaso olukhulu oluvela kwabathanda ulimi lwesintu. Uthi bazazama ngazo zonke indlela ukuthi ugwalo lwabo lolu lalo lufundwe ezikolweni zemandebeleni abafundi babhale imihloliso yenkondlo eziphuma kulo.

UThabani Sibanda ngomunye wabalobi abalenkondlo kulolugwalo. Yenake ukhethe ukuhamba ngonyawo lwembongi zasendulo ezazigiya ngokuhaya amakhosi.

Usikhipha enkundleni ngenkondlo elonda umlandu weQhawe, ubabaWesizwe okaJoshua Mqabuko Nkomo.

please wait

No media source currently available

0:00 0:06:40 0:00
Lapho esitholakala khona

XS
SM
MD
LG