amalinks wokungena

Breaking News

Woza Friday: Silomculi Womdumo weRhumba uDoubt Ncube


Doubt Ncube
Umculi weZimbabwe womdumo weRhumba okweleSouth Africa uDoubt Ncube odume ngelithi DK, uthi idlalade lakhe elitsha elithi Umkhwenyana Seyendile komamazala lemukelwa ngendlela eyisimanga ngabalandeli bakhe. Lelidlalade elilengoma eziyisikhombisa lidlalade lika DK lesithupha.

Uzelwe kibo e Mambale ePlumtree engu Doubt Ncube kodwa khathesi usedume ngelithi DK, okuligama elivela eqenjini lakhe lezomculo ele DK Super Sounds.
Linsizwa ezelwe ngu 1981 ikhule iselusa inkomo zikayise eMambale e Plumtree ndawoyinye lalapho obekwelusela khona umculi odumileyo uNdux Malax.
UDK uthi kukhona okwakumfikela nxa elandela inkomo zakhe laye angakuzwisisiyo ukuthi kuyini.

Kudlalade lakhe lakuqala alethule ngo 2010 wayesithi Baba kaNhlalo, ngo 2011 wathi Umzulu waseTsholotsho, ngo 2012 wethula Umtaka Madumane.
Ngo 2013 wawakhithiza eselekena kwaqala elithi Ngumuntu njengawe, kweza uBantu bakithi alethula ndawonye leqembu le Masiko brothers, wasecina ngaleli elitsha uMkhwenyana Seyendile komamazala.

Leli elitsha ulivule ngengoma yothando elandisa indlela azibika ngayo mhlazana eqonywa yintombi yakhe. Uthike ezimunyethwe yileli dlalade zingoma ezikhuluma ngezinto ezenzakala empilweni yansuku zonke. UDK uthi okwenza wetha leli dlalade ngendaba kaMkhwenyana osendile yisimanga abona sisenziwa ngulo umkhwenyana.

Uthi into emthokozisa kakhulu yindlela idlalade lakhe leli elemukelwa ngayo. Yenake uthi uzimisele ukuthokozisa abalandeli bakhe lobanje laye esithi ikhona indima okufuze bayidlale ukuze bathole lintokozo.

Engomeni yesine ekuleli dlalade uDK ukhumbula abaculi asebabhubhayo abanjengaboNdux Malax aze ahlabele lezinye ingoma ababedume ngazo.
XS
SM
MD
LG