Kulimpelaviki kuhlelo Woza Friday silomculi wengoma zokholo uDumisani Nyongola yena osethulela inzwisa yengoma ezitholakala kudlalade lakhe azalihwatsha lonyaka elilengoma ezilitshumi lanhlanu.
UDumisani Nkomo yena owaziwa ngegama elomsebenzi elithi Dumi Nyongola udume kakhulu ngemisebebenzi yakhe yokusina lokucula ephathisa umculi we Afro Jazz uJeys Marabini njenge backing vocalist kodwa ngomnyaka ka 2013 ucindezele elakhe idlalade ezimele yedwa elithiwa the Gospel in African Languages.
Lonyaka ke lumculi ulenhlelo zokuba akhuphe idlalade lakhe lesibili elilengoma ezilitshumi lanhlanu njalo usekhuphe ingoma ezimbili eziyinzwisa yokuba lelodlalade liquketheni.
Eyinye yalezingoma ezimbili ngethiwa Usathane unamanga okuyiyo esivule ngayo uhlelo kanye lale ethiwa Mhlobo Wami.
Umfoka Nyongola uthi isifiso sakhe ngesokuba umculo wakhe uthinte impilo kazulu ulethe utshintsho empilweni zabantu yikho nje eqhubekela phambili esenza umculo wezokholo ngoba ulomlayezo.
Igama ledlalade lika Nyongola ahlele ukulikhupha lonyaka uthi uzalethula kuzulu ngokuhamba kwesikhathi ndawonye lokuthi yibaphi abanye abaculi asebenzisane labo kodwa kulezi ngoma ezimbili ezitholakala ku single yakhe usebenze ndawonye lodadewabo uNtombi, obemncedisa ukucula, kuthi obeqoqoda ikey board ngu Israel, obenguye njalo umanjinela, ikanti amakatali abeqhunswa ngu Reason kanye lo Mthabisi.
