Amalunga ebandla le ZANU PF awesifazana athi emukela ngenjabulo ukukhethwa kukaNkosikazi Marble Chinomona ukuthi akhokhele uhlangothi lwabesifazane, isikhundla esasiphethwe nguNkosikazi Grace Mugabe.
Inengi labesifazana laba ngabasebexotshwa kuhlangothi lwabesifazane ngezizatho ezigoqela ukweyisa uNkosikazi Mugabe. Babesetheswa lecala lokufuna ukuvukela umbuso kalowo owayengumongameli welizwe ngaleso isikhathi,uMnumzana Robert Mugabe.
Unkosikazi Chinomona ngomunye okwakuthiwa kumele axotshwe ehlangothini lwabesifazane.
Abalwa kumpi yenkululeko abakhulume lalumsakazo njalo bengamalunga ohlangothi lwabesifazana kubandla le-ZANU PF bathi bayaziqhenya ngeguquko esikulibandla ngemva kweziphithiphithi ezazikhona phambilini. Bathi babehlukuluzwa lapho bethe bavusa amakhanda ukuzama ukucebisa ukuthi kuqhutshwe njani umsebenzi.
Omunye wabesifazane laba,nguNkosikazi Ntombiyakhe Ndlovu oyisiphathamandla salelibandla esigabeni se Matebeleland South e Bulilima District.
UNkosikazi Ndlovu ulandisa ngobunzima ababhekana labo.
UNkosikazi Rose Masuku oweTsholotsho esigabeni se Matebeleland North, uthi besekuyangisa lokho obekusenzakala ehlangothini lwabesifazane kubandla leZANU PF.
UNkosikazi Sihle Sithole owalwa impi yenkululeko uthi ujabule ngenguquko esikhona, ikakhulu kuhlangothi lwabesifazana.
Uthi isiphatho yena labanye bakhe ababesithola phansi kobukhokheli buka Nkosikazi Grace Mugabe, sasimenza acabange ukuthi wahambela ize empini.
Bekusinwa kujatshulwa ngemva kokukhethwa kwenkokheli zezigaba ezitshiyeneyo kulelibandla kulandela ukuxotshwa kwequla lababekade bekucele elibizwa ngokuthi yi G40, ezigoqela uNkosikazi Grace Mugabe.
Kusenjalo, uSithandekile Mhlanga weStudio 7 uxoxe loMnu. Joseph Tshuma, ilunga leCentral Committee yebandla leZANU PF, njalo emela iPhelandaba-Mpophoma edale lephalamende, yena othi isixwayiso sokukhankasela ukhetho ngokuqinileyo, sivele kuye umongameli Mnangagwa.
Siphinde saxoxa loMnu. Rejoice Ngwenya, ingcwethi ecubungula ezombusazwe, yena othi mhlawumbe kulengxaki ebhekane loMnu. Mnangagwa ekukhetheni abasekeli bakhe, ngoba ulokhu ethikaza.