amalinks wokungena

Breaking News

Mliswa: UJonathan Moyo loSaviours Kasukuwere Bayizitabane


Temba Mliswa

Ekhuluma lentathelizindaba uMliswa, uthi isiphathamandla seZANU PF uMnu. Patrick Zhuwayo laye usetshenziswa nguKasukuwere ukuzama ukukhupha uMugabe esikhundleni

Ekuqhubekeni kokulwisana phakathi kwebandla le ZANU PF, umgcinisihlalo walelibandla eMashonaland West uMnu. Themba Mliswa ngoMvulo uchothoze umphathintambo obona ngokwethulwa kwembiko uMnu. Jonathan Moyo kanye lomunye wakhe okhokhela ugatsha lwezemvelo uMnu. Saviour Kasukuwere, esithi bayizitabane njalo bafuna ukudiliza ibandla.

Ekhuluma lentathelizindaba ngoMvulo ekuseni, uMnu. Mliswa, ongummeli weHurungwe West edale lephalamende, uqhubekele phambili wathi isiphathamandla sebandla leZANU PF uMnu. Patrick Zhuwayo usetshenziswa nguMnu. Kasukuwere ukuzama ukukhupha umongameli Robert Mugabe esihlalweni emhlanganweni omkhulu walelibandla owe Congress ozakuba khona ngoMpalakazi.

UMliswa uphinde wagcona uMnu. Jonathan Moyo esithi kusobala ukuthi nguye owathi yena ulobudlelwano leziphathamandla zesigodlo seMelika esithi lokhu akusoqiniso ngoba wayekhulumisana lazo ngenhlelo zesigabeni sakhe kuphela, engakhulumi ngebandla leZANU PF.

Asenelisanga ukukhuluma loMnu. Moyo loMnu Zhuwayo ngaloludaba, kodwa sithole uMnu. Kasukuwere ecingweni yena othe uphathekile njalo kalasikhathi sokuthi aphendule uMnu. Mliswa ngoba lolu kuludaba olungelahlonzi.

Umongameli Mugabe, owazakalala ngokuchothoza izitabane, uxwayise iziphathamandla zebandla lakhe ngayonale impelaviki edluleyo ukuthi ozatholakala ememethekisa ukulwisana kulelibandla uzajeziswa.

Ukuhlaziya loludaba, iStudio Seven ixoxe loMnu. Morris Ngwenya, ingcwethi ecubungula ezombusazwe njalo elilunga lebandla leZANU PF, yena otshele uSithandekile Mhlanga weStudio 7 ukuthi iziphathamandla zalelibandla zilembono eyehlukeneyo kuphela njalo lokhu akungeke kuxegise lelibandla.

please wait

No media source currently available

0:00 0:02:04 0:00
Lapho esitholakala khona

XS
SM
MD
LG