Kulandela ukunqoba kukaMnu. Kidwel Mujuru owebandla leZANU PF kukhetho lokudinga ukhansila ka ward 28 eCowdray Park ko Bulawayo ngoMgqibelo, inengi lithi leli bandla linqobe ngoba abantu bengaphumanga ngobunengi babo ukuyavota, njalo bekuncintisa amalunga amabili ebandla leMDC elivame ukunqoba kulelidolobho.
Lokhu ngokwakuqala ukuthi ilunga lebandla le ZANU PF linqobe kukhetho lwamakhansili, kusukela ngomnyaka ka 2000. Abambalwa banqoba kukhetho lokudinga amalunga edale lephalamende kulelidolobho ibandla leMDC lize likhalale ukungena ukhetho. Kodwa abasabuyelanga ngoba banqotshwa njalo libandla leMDC.
Omunye wabo uMnu. Joseph Tshuma, Othi abantu bavotela ibandla leZANU PF ngoba bekhangwa zinhlelo zalelibandla.
Amalunga amabili abencintisa emele ibandla leMDC kulokukhetho nguNkosazana Nomagugu Mloyi loAlderman Collet Ndlovu; munye ngamunye esithi kasoze adedele omunye ngoba wakhethwa libandla. UNkosazana Mloyi uthi kunengi okubangele ukuthi ibandla lakhe linqoshwe ngeleZANU PF.