WASHINGTON DC —
Ibandla leZanu PF lithi liphakathi kokuphenya imbiko yokuthi kube lodlakela kukhetho lwalo olokudinga inkokheli yezabelo.
Isiphathamandla salelibandla uMnu Mike Bimha utshele iphephandaba leHerald ukuthi baphenya njalo imbiko yokuthi bakhona abahluthune amaphepha okuvotela babaleka lawo eHarare.
Uthe abazafunyanwa belecala bazajeziswa.
Obona ngokwethulwa kwembiko kulelibandla uMnu Tafadzwa Mugwadi, yena utshele iStudio 7 ukuthi impumela yalolukhetho izakwethulwa namuhla.
Kodwa abanye abanqobileyo bakhanya sebesaziwa nanku iZimLive ibika ukuba umphathintambo wendaba wasekhaya uMnu Kazembe Kazembe nguye onqobe kusikhundla sikamgcinisihlalo weMashonaland Central, okuyisikhundla abevele esiphethe.