Ibandla leZANU PF lithi lisola amazwi omholi weMDC Alliance kaMnu. Nelson Chamisa awethule ngoLwesithathu kumbiko wakhe omqoka, lisithi atshengisa ukungakhuli, kanye lokusilela kwesithunzi sokuba ngumkhokheli.
Ekhuluma emsakazweni weZBC namuhla, isikhulumeli sebandla leZANU PF uMnu. Simon Khaya Moyo uthe uMnu. Chamisa ugcizelela ukuthi abantu bazatshengisela njengalokho okwenzakala ekupheleni kukaNtulikazi ngomnyaka odluleyo. Uthi ibandla lakhe lihlonipha umthetho ngakho, lokhu kungenzakala, lizakutshiya ezandleni zamapholisa lanxa lingakumisa.
Wengeze wathi ibandla lakhe alilanjongo yokubhidliza ibandla leMDC Alliance, njengalokho okutshiwo nguMnu. Chamisa.
Kodwa uMnu. Nkululeko Sibanda isikhulumeli sikaMnu. Chamisa, uthi labo bayawasola amazwi kaMnu. Khaya Moyo.
Kusenjalo, ngoLwesine, abalwela ilungelo loluntu kanye labezombusazwe abaphatheke emkhosini we “Save Zimbabwe Campaign” lapho abathe ilungelo loluntu lilokhe lisephulwa elizweni njalo kufanele abantu bebambane ukuze kulunge.
Umkhosi lo unanza okwehlela abantu abatshaywa ngamapholisa ngomnyaka ka 2007 besiya emthandazweni, lapho okwalimala abanengi njalo kwabhubha uMnu. Gift Tandare webandla leMDC ngemva kokudutshulwa.
Ezinye inhlanganiso eziphatheke kulumbuthano zibalisa iCrisis in Zimbabwe Coalition, eyiyo eqoqe lumkhosi, iZimbabwe Divine Destiny, leZimbabwe Congress of Trade Unions.
Sixoxe loMnu. Sibanda njalo, ukuze sizwe ngombiko uMnu. Chamisa awethule kulumbuthano.