Ilunga lebandla le Zanu PF lithi lanikwa izembatho zebutho libandla leli ngesikhathi uzulu etshengisela emigwaqweni lonyaka ekhonona ngesimo esibi somnotho.
UMnu. Shepherd Magorimbo, obotshwe ngeviki ephelileyo wetheswa icala lokweba, wethule lokhu enkantolo eHarare lapho aveze khona ukuthi banengi abaphiwa izembatho zebutho libandla leZanu PF.
Iphephendaba leStandard libika ukuthi omunye obotshiweyo owayegqoke izembatho zebutho laye wetheswa icala lokutshontshela abantu impahla etshiyeneyo.
Ibutho libikele uzulu ukuthi kulabantu abatshontsha izembatho zebutho lemibhobho uzulu etshengisela emigwaqweni.
UMnu. Believe Gaule, ilunga lebandla leZanu PF, uthi ibandla lakhe alikwenzanga lokhu.
“Angiboni ukuthi ibandla leli lingakwenza lokhu. Kusobala ukuthi amabandla aphikisayo yiwo akhuthaza ukungezwani kwele Zimbabwe.”
Siphinde saxoxa loMnu. Prince Dubeko Sibanda, olilunga lebandla leMDC elikhokhelwa nguMnu. Nelson Chamisa, othi kathandabuzi ukuthi ibandla leZanu PF liphathisana lebutho leZimbabwe ekutshayeni abantu ababetshengisela imigwaqweni bekhonona ngesimo esibi somnotho welizwe.
“Lokho kuliqiniso ngoba sonke siyakwazi ukuthi amasotsha eZimbabwe, amapholisa eZimbabwe kasazimelanga wodwa. Sebesebenza lebabandla leZanu PF.”
Ibutho labulala abantu abalitshumi lanhlanu ngesikhathi uzulu etshenigisela emigwaqweni.