Isikhulumeli sebandla leZanu PF, uMnu. Simon Khaya Moyo, uthi kungamanga okukhulunywa nguMnu. Ambrose Mutinhiri othi owayengumongameli welizwe leZimbabwe, uMnu. Robert Mugabe, wasuswa esikhundleni libutho okungekho emthethweni.
UKhaya Moyo utshele umhlangano lentathelizindaba ukuthi uMugabe wasuswa okusemthethweni libandla leZanu PF ngemva kokungena emigwaqweni kukazulu ledale lephalamende selifake isinqumo sokuvotela ukuthi aphume yena uMugabe wahle waziphumela.
“Njengesotsha elafundiswa umsebenzi ngiku Zipra ngesikhathi sempi yenkululeko, njalo ngikhokhela ivuyo le Zipra …. Ngiyazi okumele kwenziwe libutho phansi kwesisekelo sombuso welizwe. Okwenziwayo libutho le ZDF akukho emthethweni,” kutsho uMutinhiri.
Ngempelaviki, uMutinhiri, obemela iMarondera kudale lephalamende, uthe usesuka esikhundleni lakubandla leZanu PF ngoba uMugabe wasuswa esikhundleni okungekho emthethweni.
Abebandla elitsha elisekelwa nguMugabe, elithiwa yiNew Patriotic Front, bazise ngoMvulo ukuba uMutinhiri, owayekubandla le Zapu ngesikhathi sempi yenkululeko, nguye osezakhokhela lelibandla elilamalunga exuku le Zanu PF elithiwa yi Generation 40.
Ukuhlaziya loludaba sixoxe lengcwethi ecubungula ezombusazwe, uMnu. Bekezela Maduma Fuzwayo, othi uMugabe ngabe uyazihlalela phansi azikholisele impentsheni yakhe.
“Lokhu okwenziwa ngulowu owake waba ngumongameli, uMugabe, ngombono wami ngibona engani uzithathela phezulu kakhulu. Lapha ilizwe esilihambe khona angiboni ukuthi uMugabe osala lokhu okuthiwa yi-relevance ngeSilungu,” kutsho uFuzwayo.
