Ikomishini yezokhetho isisole udlakela oluqhamuke eHarare ngoLwesine isithi ubudlwangudlwangu obunje buphazamisa imizamo yokuqhuba ukhetho olukhululekileyo.
Embikweni awethule ngeSonto, umgcinisihlalo weZimbabwe Electoral Commission, uJustice Chingumba, ukhuthaze abantu abayabe bethe bahlukulunzwa ngezizatho zombusazwe ukuthi bayemangala emapholiseni kumbe kukomishini yezamalungelo.
“Siyalusola kakhulu udlakela ngoba lulakho ukuphambanisa imizamo yokuqhuba ukhetho olukhululekileyo,” kutsho uChigumba.
“Siyabakhuthaza bonke abayabe bethe baphathwa ludlakela lwezombusazwe ukuthi bayemangala emapholiseni kumbe kuZimbabwe Human rights Commission.”
UJustice Chigumba uxwayise njalo amabandla ezombusazwe ukuthi etshiyane lodlakela.
Ingcwethi kwezombusazwe uMnu Effie Dlela Ncube utshele iStudio 7 ukuthi ayancomeka kakhulu amazwi kaChigumba.
Kusenjalo, inhlanganiso ezizimeleyo zibambane leZEC koBulawayo ngeSonto emkhankasweni wokukhuthaza uzulu ukuthi ebhalisele ukuvota ngobunengi lokuthi engaze aphatheka kundaba zodlakela.
Inhlanganiso lezi zigoqela iHeal Zimbabwe, iWILD, iChristian Alliance, iElection Resource Centre, iZimRights kanye leHabakkuk Trust.