amalinks wokungena

UZee Wengoma Wethula Idlalade leAfro Kwasa

  • Bennedict Nhlapho

UZee Wengoma

Ku Woza Friday ngoLwesihlanu besilomunye njalo umculi weZimbabwe osekhethe ukucanda umdumo omutsha ongayisiyo irhumba loba umdumo wezokholo okujwayelekileyo.

Umculi weAfro Kwasa uZibusiso Ndlovu ocula engu Zee Wengoma useledlalade elitsha elithi Ngivuswa Yisililo.

Le yinsizwa esakhulayo uZee Wengoma othwetshulwe yingwe koKhame ePlumtree. Umculo wale insizwa yiKwasakwasa yase Democratic Republic of Congo (DRC) ayixubanise lomdumo wosendo lwaMatswana.

Uthi kwezinye zengoma zakhe uye wagwegwa abakhonale eDRC kanti eBotswana uhamba lomculikazi odumileyo uSlizer.

Nangu uZee Wengoma ...
Nangu uZee Wengoma ...

“Kahle kahle oyalithola kuqala nguye ozatshela abanye, leli CD lenziwe ngendlela ephezulu kakhulu. Lingithethe 2 years ukulenza and labantu engisebenze labo, ama guitarist engisebenze labwo kuleli album, ngisebenze labantu abane experience kakhulu, ngoba ngisebenze lo Samurai Ngingo onguye odlale i lead owaseCongo, then i-rhythm ngasebenza lo Joseph Masamba wase Zambia then I bass kwadlala u Kuseri waseZimbabwe. Ngithethe the best kuma guitarist ase Africa.”

Lelidlalade lakhe lilengoma eziyisikhombisa. Kule yona ethi Ngivuswa yisililo ukhala ngalabo abafulathela abazali babo ekhaya, babatshiya besidla imbuya ngoluthi bona ngapha bezifela ngamakhumukhumu.

Uthi-ke nxa eseyixubanisa lamagitali omdumo wesiTswaneni kuphume uluju oludliwa umuntu ebotshelwe.

Lobanje abaculu abanengi befisa ngazo zonke indlela ukuyaduma emazweni, uZee yena uthi iAfro Kwasa yakhe ufuna idume kuzwekazi leAfrica.

“Iphupho lami yizikuzona sengidumile kakhulu e Africa, sengingumculi lami osedume kakhulu e Africa okokuthi sengingadlala loba kuphi e Africa, sengingumuntu mhlawumbe ofana labo Chameleon sengingumuntu ofana labo kanda Bongo Man.”

Balutshwanake abaculu beZimbabwe abathe ngokungena kwezomculo behluka kulokhu okujwayelekileyo. Inengike lingena kwezerhumba, ezokholo, imbube, I house, loba I Hipop. UZee ke yena uthi zitholele leli dlalade nawe njengom Africa uzincome ngobu Africa bakho.

Facebook Forum

XS
SM
MD
LG