Akuphumanga lutho emhlanganweni wezisebenzi zikahulumende lomqatshi obuphezu kweholo, owenzelwe eHarare ngoLwesihlanu.
Abomanyano wezisebenzi zikahulumende oweApex Council bathi kabavumelani lohulumende othi akalayo imali yokubengezelela iholo ekhala ngesimo somnotho esingamanga kuhle.
Umkhokheli we Apex Council, unkosikazi Cecilia Alexander utshele intathelizindaba ukuba bona sebediniwe ngokube beqilwa njengabantwana abancane.
“Bathi bona bazosinika lawo ma750 okwakumele basitholise wona ngoDecember, asiyali thina leyo mali kodwa akutsho lutho kithi lokho ngoba kuyimali engasoze isise ndawo. Yikho lapho esimi khona, lokhu okukuthi siyabe silokhu sidlelezelwa njengabantwana yikho osekusingenise kulinkinga. Ngoba sasisithi singakhalaza siphiwe okuyincosana, asisakufuni lokho thina ”.
Uqhubeke ethi lemali yokubengezelela ukuze banelise ukuphila eye cushioning allowance, ingatsho lutho njengoba befuna elingene laleyo ababeyihola nxa kuqathaniswa ledollar leMelika.
“Isisebenzi sikahulumende ebekuthiwa yiso esithola imali encane siku Grade D, obethola imali $1 033 – 00 ), bebesithi bona bafuna lowo muntu athole i $2 033-00 ngenyanga. Lingakhangela imali abathi bafuna ukuyiholisa izisebenzi iqalela ku $2 033 – 00 isiya kuGrade laphezulu lama Deputy Directors $2 935 – 00, kusitsho ukuba oku “B” grade wengezelelwe ngesilinganiso se 97% kuthi labo abakuzikhundla eziphezulu okunjengama Deputy Directors ingaba kusilinganiso se 80%. Konke khonokho akuselamsebenzi kithi ngoba akwemukeleki kithi njalo akusinto ongayitshela abantu. Lapho esivela khona, sithunywe yizisebenzi abakhangelele ukuthi nxa kungasahambanga ngendlela siphenduke kibo batsho ukuba kuthathwa nyathelo bani. Yikho ke esesizakwenza.”
Umnumzana Themba Ndlela, isakhamuzi semzini we Kambuzuma uthi kulusizi njalo kuyamkhathaza lokhu osekusenzakala.
“Akuselamuntu noma omunye, ongathemba ku Council leyi, izikhalazo zabasebenzi ezokuthi iholo labo lilinganiswe le poverty datum line, ezokuthi bafumane izinto zokusebenzisa emisebenzini yabo yonke abayenzayo, le cushion ye Christmas lange New Year, akulalutho olweziweyo yi Apex Council leyi. So ngubani khathesi ongazinikela, ongafaka ithemba lakhe kunhlanganiso leyiemela izifiso zikahulumende kulokuthi imele izisebenzi lama Associations angaphansi kwabo ”.
Kodwa unobhala wenhlanganiso yezisebenzi eye Zimbabwe Congress of Trade Unions – ZCTU, umnumzana Japhet Moyo uthi akubamangalisi ukwenza kukahulumende.
“Sibonile abanengi ke besehluleka ukuya emsebenzini ngesikhathi esedlulileyo, odokotela bona sebelenyanga ezintathu bengakwanisi ukuya emsebenzini ngendaba yeholo. Sitshilo ekuqaleni ukuthi sizabona ke izisebenzi ezinengi sibili zilandela khonokhu, kungayisikho kuthanda kwabo, kuyikuthi nje iholo vele kalisakwani. Akusimangalisi ke nxa sibona njalo abe Apex besiba lezinqumo ezinjalo ezokuthi iholo kalikwani ngokuba nje vele kalikwani phela iholo.”
Obekhokhela iqula ebelimele uhulumende kulumhlangano, umnumzana Moses Mike walile ukukhuluma lalumsakazo ngaloludaba.
Abe Apex Council bona bathi khona bezahlangana ngoMvulo weviki ezayo ubesethulela ngokugcweleyo okuphume emhlanganweni walamuhla lohulumende, njengeziphathamandla andubana bayekwethulela amalunga wonke akulumanyano ukuze babone ukuba bangaphuma lanyathelo bani.
