Inengi labantu liyabasola abeZimbabwe Congress of Students Union- ZICOSU, bebachaza njengabantu abathunyiweyo ukuthi basole inkulumo kaMnu. Nelson Chamisa umkhokheli weMDC.
Inkuthazo yabe ZICOSU, iza ngemva kwefanayo esanda kwenziwa ngumphathintambo wezenzakala elizweni umnumzana Cain Mathema otshele intathelizindaba ukuba uhulumende akayi kugoqa izandla ebukela abaqhuba udlakela bezenzela santando ngemva kwenkulumo ka Chamisa emhlanganweni we Congress yeMDC enzelwe eGweru.
UChamisa ubikwa etshele abalandeli bakhe ukuthi balungele ukuqhubeka ngemikhankaso yokuphikisa impumela yokhetho luka 2018.
Isikhulumeli seZanu PF sona, uAmbassador Simon Khaya Moyo uthi ayibahluphi njengebandla linkulumo ka Chamisa wamkhuthaza ukuba amanyane lozulu wonke elizweni ukudinga indlela eziletha intuthuko.
Emhlanganweni lentathelizindaba owenzelwe e Media Centre umkohkheli we ZICOSU uPijiwest Nhamburo uxwayise uChamisa ukuba ehlukane lomkhuba wokukhankasela ukutshengisela okulodlakela.
AbeZICOSU babize lumhlangano phansi kwendikimba ethi “Enough is enough: Violence begets Violence ” yona esuke yakhanga imibuzo eminengi ivelela kuntathelizindaba ukuba bayixazulule ukuba itshoni kodwa behluleka ukuchasisa.
Kunsukwana ezedluleyo abenhlanganiso yeZimbabwe Citizens Forum labo bethule isixwayiso esifanayo ngemva kokuba uChamisa losanda kukhethwa ukuba ngomunye wabasekeli bakhe, uMnu. Tendayi Biti bethule umbiko ocine uchazwa njengowokutshotshozela udlakela lapho belungiselela umhlanano wabo omkhulu oweCongress osanda kwenziwa eAscot Stadium eGweru.
Isikhulumeli salenhlanganiso ye Zimbabwe Citizens Forum umnumzana Lonius Rozvi Majoni ulandisa ngabakutshoyo ekuxwayiseni abaphatheke kunkulumo zaloluhlobo.
U Rozvi Majoni ukhuthaza indlela zokukhulumisana hatshi ukukhankasela ukutshengisela okuphetha sekubangela udlakela kanye lokubhidlizwa kwempahla yabantu elizweni.
Kodwa umnumzana Collins Ncube isakhamuzi se Harare uthi abe ZICOSU ngabantu abathunyiweyo.
U Ncube uthi akukho lokukodwa obekukhulunywa yilaba bantu okulobufakazi.
Abe ZICOSU behlulekile ukuxazulula abakutshoyo beqina ngelokuthi inkulumo ka Chamisa kayilunganga bengazange bapha impendulo yokuba kungani bekhuza icele linye beyekela abalandeli bamanye amabandla afana leZanu Pf bekhuluma santando kungela obakhuzayo.
