Inhlanganiso ye Zimbabwe Football Association bathi imali abazayithola ivela kunhlanganiso ye FIFA yimali abavele behlezi beyithola ngaphansi kohlelo lwe Forward Programme yikho akusiyo eyokuphathisa abomdlalo wenguqu ngesikhathi imidlalo imiswe yikumemetheka komkhuhlane we Covid 19.
Inhlanganiso ebona ngokuqhutshwa komdlalo wenguqu emhlabeni jikelele eye FIFA ensukwini ezedluleyo yethule umbiko othi izakupha inhlanganiso ezibona ngokuqhutshwa komdlalo wenguqu emazweni atshiyeneyo inkulungwane ezingamakhulu amahlanu zamadola aseMelika.
Ngemva kokuphuma kwalumbiko ovela kunhlanganiso ye FIFA bakhona abakade sebesithi limali kumele iphathise abaphatheke kwezomdlalo wenguqu njengoba imidlalo imisiwe kulezinsuku ngenxa yomkhuhlane we Covid 19.
Isikhulumeli senhlanganiso ebona ngokuqhutshwa komdlalo wenguqu kwele Zimbabwe eye ZIFA uXolisani Gwesela uchasise ukuba limali abazayithola emalangeni ayilani lomkhuhlane we Covid 19.
“Imali leyi ekhulunywe yi FIFA ukuba sizayithola yimali esivele sihlezi siyithola ngaphansi kohlelo lwe Forward Programme okuzimali ezinceda amalunga enhlanganiso ye FIFA.
Sithanda ukwazisa uzulu ukuba kukhona uhlelo lwe Relief Programme okuyilo oluzanceda amazwe wonke abahlaselwe kakhulu ngumkhuhlane we Corona.
Sesibhalele amalunga enhlanganiso ye ZIFA sibacela ukuba basazise indubo abahlangane lazo ukuze sibancedise ngemali lezo ezivela ku Relief Fund,” kutsho uGwesela.
Umnikazi weqembu le Ajax Hotspurs, elidlala kusigaba se Southern Region Division One, uSiphambaniso Dube, uthi sebeke bacelwa ukuba batshele inkokheli ye ZIFA ukuba bathinteke kangakanani yikumiswa kwezemidlalo elizweni njalo balinde ukuba babone ukuba sizo bani abazaluthola.
“Uncedo lwe ZIFA silukhangelele kakhulu ngoba ukuqhamuka komkhuhlane we Covid 19 kwenze izinto zaba nzima kakhulu ngoba besesivele sesiqalile amalungiselelo ethu alonyaka.
Yikho ke nxa inhlanganiso ye FIFA izaphathisa leloncedo silukhangelele kakhulu ngoba sesivele sesizaqala kutsha amalungiselelo awesizini yalonyaka,” kutsho uDube.
Intathelizindaba yezemidlalo uNash Mkokwayarira uthi yena kuzakuba nzima ukuba abaphatheke emdlalweni wenguqu baphathiswe bonke ngoba isimo ababhekane laso sehlukene kakhulu.
“Ungathi uyananzelela uzathola ukuba wonke umuntu uthintekile ngokuqhamuka komkhuhlane we Corona yikho ke ngubani ozaphiwa imali njalo ngubani ozancitshwa. Ngokubona kwami limali kumele ifakwe kunhlelo ezokuthuthukisa umdlalo wenguqu kwele Zimbabwe hatshi ukuthi iphiwe abadlali abazayidla kuhle kube yikuphela kwayo,” kutsho uMkokwayarira.
Amaqembu adlala kusigaba saphezulu ese Premier Soccer League lamanye adlala kusigaba sika Division One yiwo asenkingeni kakhulu ngoba wona eholisa abadlali kanye lezinye izisebenzi zawo ikanti inengi lamaqembu adlala kuzigaba ezingaphansi kawaholisi abadlali.
Inengi lamaqembu adlala kusigaba se PSL athola imali yokuholisa abadlali emalini eyabe ibhadalwe yizibukeli.
Inhlelo zemidlalo kwele Zimbabwe zimiswe ngesikhathi kusethulwa umlayo wokuba abantu behlale ezindlini okwamaviki amathathu ekupheleni kwenyanga kaMbimbitho.
Lesisikhathi siphinde sangezelelwa ngamaviki amabili ngoba inani labantu asebetholakale belegciwane le Corona lilokhu lisanda elizweni.
