amalinks wokungena

Breaking News

ZIFA: Izancedisa Amaqembu Esizwe Imali yeFIFA


Zifa

Inhlanganiso eqondisa umdlalo wenguqu, eye Zimbabwe Football Association ithi eyinye yemali abayiphiwe ukuze iphathise ngemva kokuphazamiseka komdlalo lo, sekuqhamuke umkhuhlane we Covid 19 izasetshenziswa ngamaqembu amela ilizwe, emidlalweni lamanye amazwe.

Ekhuluma ngoMgqibelo odlulileyo, isiphathamandla senhlanganiso ye ZIFA uPhilemon Machana utshele intathelizindaba zemidlalo ukuba imali evele kunhlanganiso ye FIFA kumele iphathise inhlangothi zonke eziphatheke emdlalweni wenguqu elizweni lase Zimbabwe.

“Zinengi ingatsha ezingaphansi kwenhlanganiso ye ZIFA okumele zithole limali. Banengi njalo abantu okumele baphathiswe yimali leyi. Laba ngabagoqela labadlali bamaqembu amela isizwe nxa sidlala lamanye amazwe. Abantu bengakuthathi njengokuthi singontando kayiphikiswa,” kutsho uMachana.

Inhlanganiso ye ZIFA ihlezi ingexabana labadlali phezu kwemali njalo nyakenye iqembu labesifazane elaziwa kakhulu ngegama elithi Mighty Warriors layala ukudlala leqembu le Shepolopolo elase Zambia ngoba lingaphiwanga imali.

Kube lokukhonona ensukwini ezedluleyo ngemva kokuba inhlanganiso ye ZIFA ikhuphe umbiko isithi izaphathisa amaqembu adlala kusigaba se Premier Soccer League kanye lamaqembu abesifazane.

Abanye bebesola besithi inani elizaphiwa amaqembu ePSL lincane ikanti abanye njalo bebebuza ukuba yindaba kungakhulunywa ukuba amaqembu adlala kuzigaba eziphansi azaphathiswa njani.

Oleqembu labasakhulayo uFaith Ndlovu uthi kumele inhlanganiso ye ZIFA ikubeke sobala okuzakwenzakala ngemali.

“Kuqakathekile ukuba inhlanganiso ye ZIFA iyenze kucace ukuba imali ze FIFA zizayabiwa njani ngoba phela abantu bavele kabalathemba elokuba iqhuba inhlelo zayo ngemfanelo.

Okunye okwenza abantu babelensolo yikuba i Zifa ifuna ukupha ingatsha zayo imali yakwele Zimbabwe yona iphiwe imali yase Melika,” kutsho uNkosazana Ndlovu.

Inhlanganiso ye ZIFA ithole phose izigidi ezimbili zamadola aseMelika okuyimali evele kunhlanganiso ye CAF kanye leye FIFA okuyimali ephiwe amazwe ukuze aphathiseke ngemva kokuqhamuka komkhuhlane we Covid 19.

Nxa isitshintshelwe kweyase Zimbabwe limali iba yizigidi ezilikhulu letshumi elilodwa.

Facebook Forum

XS
SM
MD
LG