Amapholisa abophe aphinda akhulula amalunga enhlanganiso yababalisi eyeAmalgamated Rural Teachers Union of Zimbabwe (ARTUZ) abatshengisele emigwaqweni eHarare ngoMvulo besithi kabasayifuni imali yohlobo lwama bond notes njalo kabasoze basebenze ngoLwesibili ngesikhathi kuvulwa izikolo.
Ababalisi laba bathi imali yohlobo lwama bond notes kanye lama RTGS sokugugudeke isisindo okumangalisayo okwenza ukuthi behluleke ukuphandela imuli zabo ukudla.
Sebefuna ukuthi bahole amadola eMelika njengalokho okufunwa ngodokotela abakhalala umsebenzi ngoMpalakazi.
Batshengisele phandle kwamawofisi kaMnu. Mthuli Ncube, umphathintambo kahulumende obona ngezemali, lapho abaveze ukuthukuthela lokucaphuka ngoba amapholisa kade ebathwalise nzima.
Babotshwe okwesikhatshana bakhululwa basebebuyela emigwaqweni lapho abahlabele baze batsha amazwi.
UMnu. Fortune Jamela, unobhala jikelele wenhlanganiso yeARTUZ, uthe kababuyeli emsebenzini ngoLwesibili.
“… Into esiyithengayo ithengiswa ngama dollar eMelika, imithi ezitolo lakho konke nje … Nxa uMthuli Ncube engakwenzanga lokhu (engabaholisi ngamadola) abantwana bazalahlekelwa kakhulu ngoba thina ngeke sibuyele emsebenzini.”
Ngemva kokubotshwa kwabo, uJamela uthe kube lokujikelana inyoka ephilayo kwamapholisa enkambeni yeCentral Police ngesikhathi amagqwetha eZimbabwe Lawyers for Human Rights abezobamela.
“Ekufikeni eCentral kube lokuphoselana inyoka ephilayo. Akule obesevuma ukuthi laba abantu ngibabopheleni …”
UMnu. Allister Pfunye, owenhlanganiso yabatsha eyeGenerational Consensus ongomunye wabakade betshengisela, uthe konke lokhu kuveza ukuba uhulumende kaMongameli Emmerson Mnangagwa akehlukananga lokaMnu. Robert Mugabe, owayengumongameli welizwe leZimbabwe.
“Nxa sikhangele isehlakalo esenzakele lapha eAfrica Unity Square kusitshengisa ukuthi kwantshintshwa ibizo kusuka kuMugabe kusiba ng Mnangagwa ngoba silokhu sibona imithetho emibi, izahluko zesisekelo sombuso wesizwe zisephulwa nguhulumende esasikhangelele ukuthi uzakwenza izifiso zabantu, njalo mina ngokubona kwami kulilungelo lokuthi abantu betshengisele ikakhulu sikhangele umnotho welizwe.
“Indaba yababalisi izwisa ubuhlungu ngoba singakhangela khathesi umholo wabo usufinyezwe wafika kuUS$60 nxa uyikhangela ngama bond kusitsho ukuthi sekumele behlale inyanga yonke bephila nge$60 engeneli lutho ngapha balabantwana abayabe bevula izikolo lemnakholitshini njalo balemuli abamele bazikhangele endlini. So, kutshengisa ukuthi izinto azimanga kahle.”
