Abaphila lobugoga obugoqela ukungaboni, abangezwayo endlebeni labanganelisi ukukhuluma, bathi kunengi okusamele uhulumende weZimbabwe akwenze ukubaqakathekisa nxa kuhlelwa inhlelo zezempilakahle okubalisa ukulwisana lokusabalala kwegciwane lengculaza.
Bathi ukubatshiya phandle kwenhlelo ezitshiyeneyo kulakho okudala ingozi enkulu njalo kuphazamise imizamo yokwehlisa inani labehlelwa yiloludubo.
Obona ngokuqhutshwa kwenhlelo zabasakhulayo kunhlanganiso yeDisability HIV/Aids Trust (DHAT), uMnumzana Edwin Ndlovu, ongaboniyo, uthi inkinga yikuba uzulu lohulumende kababona njengabantu abangaphatheki kwezamacansi.
Umnumzana Thembela Sibanda waseGwanda eGwalanyemba, yisifundi ekholitshini le University of Zimbabwe, ongomunye wabangaboniyo. Uthi luyasilela ulwazi oluqondiswa kwabanjengaye kwezokuzivikela kugciwane lengculaza.
Uthi ufisa ukuthi nga bayalutholiswa lolo lwazi njalo lubekwe ngendlela ezwisiswa ngabanjengaye.
Umnumzana Abrahama Mateta, laye ongaboniyo, uligqwetha elilwela ilungelo labaphila lobugoga. Uthi bengatshiywa phandle kulez’inhlelo kudala ingozi enkulu.
Lanxa ilizwe selanelise ukuphuma lenhlelo eseziphathise ekusabalaliseni ulwazi ngenhloso yokulwisana lodubo lwe ngciwane le HIV kanye lengculaza, lokhe lusilela lolo lwazi kwabalobugoga.
Inhlolisiso eyenziwa ngabenhlanganiso yomanyano wamazwe omhlaba ngomnyaka ka 2012, yakuveza obala ukuba abagogekileyo eZimbabwe, kabalutholi ulwazi olumqoka kundaba zegciwane lengculaza, bengekho abatolikela ngolimi abaluzwisisayo okufana le brail le sign language.
Lokhu kungalesi simo ngoba kulokukholwa ukuba kabaphatheki kwezemacansini ikanti akunjalo njengoba belemizwa labo ebenza benze konke okwenziwa nguye wonke umuntu.