amalinks wokungena

Breaking News

USadio Mane Wephule Inhliziyo Zabantu eZimbabwe


USadio Mane odlalela iqembu leSenegal emidlalweni eyeAfrica Cup of Nations. (AP)
USadio Mane odlalela iqembu leSenegal emidlalweni eyeAfrica Cup of Nations. (AP)

Iqembu labesilisa elimela iZimbabwe emdlalweni wenguqu namhla linqotshwe nge 1 ka nya ngele Senegal emdlalweni walo wakuqala kumncintiswano we Africa Cup of Nations oqhutshelwa kwele Cameroon.

Umgadli odlalela iqembu leLiverpool kwele Ngilandi ,uSadio Mane, nguye ohlohle igoli elidale umehluko sekusele imizuzwana ukuba umdlalo ufike komlindi uyacina.

UMane uhlohle umbekwa ngemva kokuba umdlali we Zimbabwe uKelvin Madzongwe esebenzise isandla ukuvimba ibhola ebeliqonde esangweni.

Ekhuluma ekupheleni komdlalo owayengukaputeni weqembu le Zimbabwe uBenjani Mwaruwari uthe ujabuliswe yindlela iqembu le Zimbabwe elidlale ngayo loba nje licine lidliwe.

“Namhla badlale kuhle kakhulu. Ngikholisile indlela esidlale ngayo ngesikhathi sivikela isango lethu langesikhathi sihlasela. Besiyimbumba. Nxa singenelisa ukudlala ngendlela efanayo emdlalweni olandelayo iqembu esizadibana lalo sizalibulala,” kutsho uMwaruwari

UMwaruwari ubecungula umdlalo wanamhla ekumabonakude we Supersport.

Limpumela itshiye iqembu leSenegal lihlezi phezu kwengalane eyesibaya sika Group B lilemiklomelo emithathu kuthi ele Zimbabwe lisemsileni lingela mklomelo.

Omunye umdlalo wesibaya sika Group B ophakathi kweqembu leMalawi lele Guinea ulandele owe Zimbabwe lele Senegal.

Emdlalweni walo wesibili iqembu le Zimbabwe lizadlala lele Malawi ngoLwesihlanu mhla zilotshumi lane kusithi ngosuku olufanayo ele Senegal lizadlala lele Guinea.

Kowesithathu njalo ungowokucina iqembu le Zimbabwe lizadlala lele Guinea ngoLwesibili mhla zilitshumi lathoba minwe mbili.

Kulamaqembu angamatshumi amabili lane aphatheke kumncintiswano we Afcon oqhutshelwa elizweni lase Cameroon njalo afakwe kuzibaya eziyisithupha isibaya ngasinye silamaqembu amane.

Ngemva kwemidlalo yezibaya amaqembu amabili ayabe ehlezi endaweni ezimbili eziphezu kwengalane kanye lamanye amane ayabe ephutshe esendaweni yesithathu njalo elemiklomelo ethe xaxa kulamanye yiwo azadlulela kusigaba esilandelayo esomncintiswano.

Umncintiswano we Africa Cup of Nations uqale ngeSonto lapho iqembu elimele ilizwe eliyilo eliqoqe limidlalo ele Cameroon elitshaye khona ele Burkina Faso nge 2 ka 1 kuthi ele Cape Verde linqobe ele Ethiopia nge 1 ka nya.

Limpumela itsho ukuba iqembu le Cameroon yilo elihlezi phezu kwengalane yesibaya sika Group A lilemiklomelo emithathu kuthi ele Cape Verde lalo lilemiklomelo emithathu kodwa lisendaweni yesibili ngoba lona lihlohle kanye kuphela.

XS
SM
MD
LG