amalinks wokungena

Breaking News

Inkokheli yeSADC Yenza Umhlangano Oqakathekileyo Ngesikhathi Amalwecatsha Ebulala Abantu Abanengi eMozambique


UMongameli Emmerson Mnangagwa loMongameli Mokgweetsi Masisi

Inkokheli yamazwe akunhlanganiso yomanyano wamazwe awezansi yeAfrica, eye Southern African Development Community (SADC) izahlangana kweleMozambique kusasa langoLwesihlanu, ihlaziya udaba lokuthi kungathunyelwa na, ibutho lokuyalwisana labalwa becatsha, abesiIslam bedlulisa amalawulo, esigabeni seCabo Delgado, esingentshonalanga kwalelo lizwe.

UMongameli Mokgweetsi Masisi wakwele Botswana, ongumngcinisihlalo wogatsha lweSADC olubona ngezombusazwe kanye lezomvikela, uthi kuqakathekile ukuba kuphunywe lesinqumo esiqinileyo phezu kodaba lweMozambique.

UMasisi kanye loMongameli Emmerson Mnangagwa loMongameli Cyril Ramaphosa wakwele South Africa bazaba khona emhlanganweni lo.

EleBotswana, South Africa kanye leZimbabwe, yiyo amazwe abumba ugatsha lwe SADC olubona ngezombangazwe kanye lezomvikela – iSADC organ on Politics, Defence and Security.

Nyakenye ngoLwezi, ekhuluma ngemva komunye umhlangano weSADC owawuqoqwe ukucubungula isimo eMozambique uMasisi, wayethembise ukuthi bazaphuthuma bangenele kudubo osolubhekane leMozambique.

“Umhlangano lo, uphume lezinqondiso zokuqinisa indlela yokuthi silwisane lodubo lolu, okugoqela ezomvikela esilazo eSADC. Amanye amanyathelo yikuthi siqinise indlela zokwenqabela ukuqela kwabo malwa becatsha.”

Kodwa iSADC ibilokhe ingakayenzi okukhanyayo phezu kodaba lweMozambique.

EleMozambique liphakathi kwempi labalwa becatsha, abokholo lweIslam abedlulisa amalawulo, abe ISIS esigabeni esinothe kakhulu ngamafutha ezimota, eseCabo Delgado.

Evikini esanda kudlula kubulewe abantu abambalwa inkulungwane lenkulungwane zabantu zabaleka edolobheni lePalma okuyikho okulodubo olukhulu zisiya edolobheni lePemba. Abanye bababuleweyo ngabadabuka emazweni afana leSouth Africa, osekudale ukuthi inkokheli yeSADC ibize umhlangano ozangenwa lamuhla lakusasa eMaputo.

Kulokwesabela ukuthi udlakela oluseMozambique lulakho ukumemetheka lungene kwamanye amazwe asemhlubulweni wangezansi kweAfrica.

Abanye abeZimbabwe kweleBotswana, abafana lomnunzana Mthabisi Dube bathi kuqakathekile ukuthi inkokheli yeSADC, iphume lamaqinga angaphathisa ngekusasa yeMozambique, kanye lezansi yeAfrica jikelele.

“ISADC siyakwazi ukuthi abalamazinyo, ngakho asiboni ukuthi bangayenza lutho ngesimo seMozambique. Asiboni kulolutho olungenzakala, ngoba abakatshengisi ukuthembeka.”

Okukhathaza abanye yikuthi inhlanganiso yeSADC isiphenduke idale lokukhuluma kungelazenzo esihamba lamazwi.

UMnu. Benjamin Sibanda, ohlala eGaborone uthi kuyethusa okwenzakala eMozambique, ngakho isikhathi somlomo kuphela sesidlule.

“ISADC ilembali yokuba yinhlanganiso engalamazinyo. Kulenhlupho ezehlela amazwe, kodwa iSADC njengomama ukuthi angenele ngendlela ebonakalayo, kujayele ukwehlula. Njalo angiboni ukuthi bangakhipha ibutho (eliya eMozambique), ngoba iSADC ilamazwe axhegayo angelamandla wokuthatha amanyathela.”

UMasisi kanye loRamaphosa babikwa besithi akuthunyelwe ibutho esigabeni seCabo Delgado, okungumbono abazawufaka phambi komhlangano wakusasa.

UMasisi uhlangene lomongameli Mnangagwa kanye loRamaphosa ensukwini ezisanda kwedlula, kuyikudinga indlela okungaxazululwa ngayo ingxaki ezibhekane leMozambique.

NgoLwesine, abaphathintambo bamazwe womathathu athi iBotswana, South Africa kanye leZimbabwe bakhangelelwe ukuhlanganisa amakhanda ngaphambilini komhlangano wenkokheli yamazwe abo.

ISADC kayilabutho njengenhlanganiso kodwa amazwe atshiyeneyo alamandla okuthumela amasotsha awo.

Facebook Forum

XS
SM
MD
LG