Abenhlanganiso ezimela ababalisi bathi bazaqhubekela phambili bekhalala umsebenzi kusukela ngoLwesibili ngemva kokuba usuku ezalunika uhulumende ukuthi abe eselungisise izikhalazo zababalisi selwadlula.
Phakathi kwezikhalazo zabo, ababalisi bafuna ukuholiswa ngedola leMelika besithi kungenxa yokuthi liqhubeka lincipha bengeselenisi ukuphila ngalo nanku lentengo yempahla lokudla ikhuphuka nsukuzonke.
Abenhlanganiso lezi bavumelene ukuthi ababalisi babuyele emisebenzini kuvulwa izikolo kumaviki amathathu adluleyo besithi banika uhulumende isikhathi sokuthi abe eselungisise izikhalazo zabo kusiyafika umhlaka 25 Zibandlela andubana bekhalale umsebenzi.
Kodwa umkhokheli womanyano wenhlanganiso ezimmela izisebenzi zikahulumende oweApex Council, uNkosikazi Cecilia Alexander, uthi kulabanye kulumanyano abalomnqondo wokuthi izisebenzi zikahulumende kumele ziqhubeke zisebenza kusakhulunyisanwa lomqhatshi ngodaba lweholo.
Kodwa umkhokheli wenhlanganiso eye Progress Teachers Union of Zimbabwe, uMnu. Takavafira Zhou, uthi inhlanganiso zonke ezimele ababalisi zivumelene ukuthi ababalisi bame ukuya emisebenzini ngoLwesibili.
“Kusobala ukuthi kusasa sizakhalala imisebenzi ezikolo njalo angiboni ukuthi nxa kulomuntu othi uzakuba efundisa kusasa lowo muntu ungumbalisi ngoba zonke inhlanganiso zivumelene ukuthi kusasa ababalisisi bazakhalala umsebenzi.”
Eyinye inhlanganiso emela ababalisi basemaphandleni eye Amalagamated Rural Teachers Unions of Zimbabwe (ARTUZ) ithi layo yazise amalunga ayo ukuthi angayi emsebenzini kusasa.
Unobhala jikelele wale inhlanganiso, uMnu. Fortune Jamela, uthi abasoze babuyele muva nxa bengaphiwanga iholo labo ngedola leMelika.
UNkosikazi Mary Tshuma ongumbalisi, uthi ukhangelele laye uzakhalala umsebenzi njengabanye bakhe.
“Thina njengababalisi istrike sakusasa sisilindele, sisikhangelele kakhulu ngamehlo abomvu. Ngijabuliswe yikuthi inhlanganiso zethu zombili eze ZIMTA lePTUZ ezilababalisi abanengi sezisuke zabambana zavumelana, le circular abakade besinika zona namhlanje zitsshengisela ukuthi sebebambene bavumelana into eyodwa.
“Akusela kuphikisana akusela kudonselana ngakho-ke ngesizatho sonalesi kusukela kusasa nje akula muntu obuya kusasa, sesivumelene ukuthi sesiyekela ngoba sinanzelele ukuthi leAPEX Council ekade sikhangelele ukuthi lathi isimele kodwa kukhanya ukuthi uCecilia Alexander lo onguye okade emkhulu kiyo kukhanya angani usephiwe isikhundla kuNASA so akasela zikhalazo zethu enhlizweni yakhe.”
Imizamo kahulumende yokuncenga izisebenzi yehlule loba uhulumende engezelele imali kuhlangothi lukahulumende lwezemfundo ngesigidi ezingamakhulu amathathu - $300.
Izisebenzi eZimbabwe kazisafuni ukuhola ngama bond notes lama RTGS zisithi uhlobo lwemali lolu sokugugudeka okumangalisayo okwenza ukuthi behluleka ukuphila ngemfanelo.
