Kuqhubekele phambili ngoLwesihlanu ukutshengisela kwamanye amalunga ebandla leZanu PF afuna kuxotshwe uNkosikazi Eunice Sandi Moyo, usibalukhulu wedolobho lakoBulawayo, owetheswa icala lokuthi ufuna ukukhipha uNkosikazi Grace Mugabe esikhundleni sohlangothi lweWomen’s League.
Loba ephika aze embe phansi uSandi Moyo, ngoLwesihlanu kulalabasakhulayo ababambisane labesifazana bebandla leli batshengisela phandle kwamawofisi eZanu PF efuna ukuthi axotshwe kanye loNkosikazi Sarah Mahoka, omele ibandla leZanu PF edale lephalamende.
Abatshengiselayo kade behlabelela ngolimi lweSiShona akulangitsho leyodwa ingoma yeSiNdebeleni abayihlabeleyo zonke bezihaya uNkosikazi Sandi bethi kahambe.
USandi Moyo uthe uvele usekhulile njalo kakulalasikhundla asibangisayo. Ufisele umaqoqa ukutshengisela inhlanhla kulokho akwenzayo.
Kusenjalo, uBulawayo usethe uhlelo lokubhalisa abazavota olwe Biometric Voter Registration luhle noma-nje uhulumende eselwenza lube luhlelo olubi emehlweni abantu.
Bathi uhlelo lolu lulakho ukwehlisa ubuqili kanye lokuvota kabili.
UBulawayo ubethe gwaqa eCillas Conference Centre lapho abathe kubi ukungenela kweZimbabwe Electoral Commission ekuvaleleni inhlanganiso yomhlaba eye United Nations Development Program ekuthengeni imitshina besithi njengoba bevalelwa ukuthenga imitshina yokubhalisa abazavota kuhle ukuthi bathenge imitshina yokuvota ukuze ukhetho oluzayo lubelequla elitsha labazavota njalo kuvotwe ngendlela entsha engela buqili.
UMfundisi Useni Sibanda, olilunga leboard yeElectoral Resource Centre, uthe uhlelo lweBVR luhle njalo yilo oselusetshenziswa kulez’insuku laloba okwamanje eZimbabwe luzasetshenziswa ukubhalisa ukuvota.
Uthe uhulumende kumele avumele iUNDP ukuthi iphatheke ekuthengeni imitshina yeBVR ngoba sebelolwazi. Ugcizelele esithi uzulu uselovalo ngoba inkampani eyetheswa icala lokuqila kukhetho eyeNIKUV layo iyafuna ukuthengisela ilizwe imitshina leyo.
UDokotela Samukele Hadebe uthe abantu bathi bayayifuna iBVR kodwa sebelokuthandabuza ngoba uhulumende usexamalaza ekuyethuleni.
Olwela amalungelo oluntu, uMnu. Themba Chiveya, uthe uhlelo lweBVR uma lusenziwa ngendlela eqondileyo luhle kodwa iZEC isisibalobutshapha osokubangele ukuba abantu babelokuthandabuza ukuba luhlelo olulezithelo.
Uhlelo lweBVR luhlelo lokubhalisa ukuvota umuntu esebenzisa iminwe kumbe ilihlo njalo okwamanje iZimbabwe iphakathi kokulungiselela ukuthenga leyomitshina kodwa uzulu uyathandabuza indlela uhlelo oluqhutshwa ngayo.
