amalinks wokungena

Breaking News

Bayakhala Ababalisi Ngeholo Eliphansi eZimbabwe


FILE: Ababalisi abakhonona ngeholo eliphansi bahamba ngenyawo besuka eMutare besiya eHarare becela uhulumende ukuba abengezelele iholo.

lnhlanganiso ezimele ababalisi zithi ababalisi sekulesikhathi besehluleka ukuthi baziphilise ngeholo labo ngakho-ke abakucelayo kuhulumende yikuthi babiselwe eholweni labo ababelithola ngomnyaka ka2018.

lzikolo lokhe zavulwayo mhlaka 15 lamhlaka 22 Mbimbitho abantwana bahamba okwamalanga amabili esikolo kodwa kulamalanga abanye sebehamba kanye ngeviki. Kwamanye amalanga ababalisi bayabe bengekho esikolo ngezizatho zokukhalala umsebenzi.

UMnu. Thembakuye Moyo, umgcinisihlalo wesigaba seLupane kunhlanganiso yababalisi eyeAmalgameted Rural Teachers Union of Zimbabwe, uthi ababalisi sebebekezele kwenela.

“Ababalisi sebebekezele isikhathi eside lokhe bezama ukuxoxisana lohulumende ngendaba yeholo labo, bona bavele abakhaleli ukuthi iholo labo likhutshulwe kodwa bakhalela ukuthi libiselwe lapha elalikhona ngo2018 okumanje uhulumende setshengise ukungahloniphi ingxoxo ngoba nxa ebuya kuzokhulunywa uhle abuye ephethe ukuthi yena uzolinikani abuye ethusele abantu ukuthi ungasebenzanga awuholi. Ngakho ababalisi bathi ukuphombukukhuluma besethuselana loHulumende akusebenzi ngcono benze lokhu okuhambelana lemali yabo abayiholayo.”

UNkosikazi Sukoluhle Ndlovu, umgcinisihlalo wesigaba seMatebeleland North, uthi yonke into isithengiswa ngedollar leMelika ngakho imali abayiholayo ayiseneli lutho.

“Sesibonile ukuthi uhulumende lokhe esehluleka ukuthi asilalele kuzikhalazo zethu sokuthi imali esiyiholayo ayikwani, njengababalisi sesibonile ukuthi khona ngangcono sibeke izikhali zethu phansi engxenye uhulumende engasizwa.Khathesi akulanto eyenelayo ukuthi siyenze ischool fees zabantwabethu ayikwani lokudla ngoba yonke into intengo isiyi US$ so sithi kasibisele kuUS$450 ebesiyihola ngo2018.”

UMnu. Vusumuzi Mahlangu, okunhlanganiso yeProgressive Teachers Union of Zimbabwe, uthi ababalisi sebebakhuthaze ukuthi bahambe amalanga amabili ngeviki.

“Sesikhuthaze ababalisi ukuthi bahambe emsebenzini amalanga amabili kuphela ngoba iholo lenela ukuthi bahambe kanye loba kabili emsebenzini. Sikhangelele ukuthi uhulumende uzaphuma lendlela ezizancedisa ababalisi ukwenzela ukuthi benelise ukuphila.

“Esikutshoyo njengenhlanganiso yikuthi ababalisi umsebenzi bayawufuna njalo bayawuthanda kodwa sekusehlula ukuthi bafike emsebenzini ngendlela zokuthi balambile lendleko ezikhangelane labo ngeholo labo abasenelisi. Sikhangelele ukuthi uhulumende akhuphule iholo libuyele esilinganisweni kulokho okwakuyikho khona kungakacitshwa iUSD sikhangelele ukuthi baphiwe iUS kumbe imali yeZimbabwe nge rate ye interbank.”

Omunye umzali, uNkosikazi Sibonile Ndlovu, uthi kuyadanisa okwenzakala ezikolo.

“Ngilokudana lokuthukuthela ngesenzakalo esesisenzakala eZimbabwe, ukuthi kunjenje sesithethe abantwana sabahambisa ezikolo kodwa ama teacher awasayiesikolo. Engikudanela kakhulu nguhulumende nga uyaxazulula ingxabano yakhe lama teacher abantwabethu benelise ukufunda ngoba abantwana yibo abasuffer lathi ama parents sesithwele nzima besingazange sikukhangelele lokhu okuyinto kwakhona kusuka sokungani kusuffer thina ama parents sidinge imali nzima sibhadalela abantwana bafike bahlale ezikolweni bengasafundi beswela lobakhangelayo thina sithembe ukuthi bazafika bafunde njalo.”

Kumaviki adluleyo ababalisi bale ukwamukela imizamo kahulumende yokuthi iholo labo likhutshulwe ngesilinganiso amatshumi ayisikhombisa lanhlanu ekhulwini - (75%).

Imizamo yokuxhumana lomphathintambo wePublic Service, Labour and Social Welfare yehlule ngoba ubengaphenduli ucingo, kodwa kumaviki amabili adluleyo usikhwicamfundo Paul Mavhima wathi ukukhulumisana kuyaqala kuyonale iviki lapha okuzaba lomhlangano lo njalo uzaqinisekisa ukuthi uyalulandelela loludaba.

Facebook Forum

XS
SM
MD
LG