amalinks wokungena

Breaking News

Izizalwane zeZimbabwe Zibukisa Impahla Embukisweni weBotswana Consumer Fair


Abasembukisweni weBotswana Consumer Fair ...

Ugatsha lukahulumende weZimbabwe olubona ngezokuthenga, ukuthengiselana kanye lezamafekithali olweTrade and Industry luthumele osomabhizimusi abacathulayo lasebexhile impande kulokho abakwenzayo abafika isificaminwembili ukuyaphatheka embukisweni wezokuthengiselana owe Botswana Consumer Fair, osesigodlweni iGaborone.

Umbikiso lo uvulwe ngoMvulo.

Abanengi abavela kwele Zimbabwe babukisa abazilungisela khona ngezikhumba zenyamazana ezitshiyeneyo.

Ugatsha olubona ngezokuthenga, ukuthengiselana kanye lokuthuthukisa amafekithali, olweTrade and Industry, yilo oluhlawule indleko yokuthi abamabhizimusi la bezobukisa eGaborone.

UNkosikazi Evelyn Musakasa, ongomunye obukisa impahla etshiyeneyo ayilungisa ngezandla egoqela okwelukwayo, uthi uhulumende uyabancedisa ukuthi baqhube umsebenzi wabo.

"Siphathiswa lugatsha oluncedisa amabhizimusi asachathulayo. Sibuye lesikwenzayo, mina ngikhangele okwenziwa ngesigodo, okokweluka okunjengamalembu etafula njalo ngiyeluka lezigqoko zabantwana."

Uthi uyajabula ngasekubone kulombukiso lokhe uvulwe ngoMvulo njalo kuthembisa ukuthi bazathola ibhizimusi ngempela.

"Sikhangele ukuthi sithole abathengayo njalo sibuye minyaka yonke kumbe lobudlelwano phakathi kwabe Botswana labeZimbabwe. Siyabonga uhlangothi lukahulumende olukhangelane lamabhizimusi olusincedisa kakhulu ekwenzeni impahla yethu. Sihamba amazwe amanengi sibukisa ngenxa kahulumende."

Uqhubeke esithi usethole abantu abatshengise ukuthakazelela impahla yabo.

"Bayawafuna ama products ethu. Bafuna ukuthenga njengoba ubona ngiseluka kanje, sengitholile omunye ofuna ukuthenga."

UMnu. Innocent Dzumbunu, owekampani eyenza izigqoko zemisebenzi yemigodini, uthi laye uyajabula ngakubonayo lokhe beqale ukubukisa ngoMvulo.

"Ibhizimusi inhle, abantu bayabuza ngesikwenzayo, kukanti abanye bafuna ukuthenga. Sithemba ukuthi kusiyaphela umbikiso siyabe sesithole abanengi abathengayo."

Umbukiso omkhulu oweBotswana Consumer Fair wenziwa minyaka yonke njalo yiwo umbukiso wamambhizimusi omkhulu kwele Botswana ophose ufane leZimbabwe International Trade Fair, njalo lawo ukhanga abamabhizimusi abaphuma ngaphandle kwelizwe, ukuzabukisa.

Udaba Esilethulelwe NguMartin Ngwenya
please wait

No media source currently available

0:00 0:02:52 0:00

Facebook Forum

XS
SM
MD
LG