amalinks wokungena

Breaking News

Izizalwane zeZimbabwe Ezihlala eBotswana Zidla Ingqweqwe Zomlomo


Izizalwane zeZimbabwe zingena kwele Botswana.

Izizalwane zeZimbabwe ezihlala kwele Bostwana zithi akulula ukuthola imisebenzi kulelolizwe kodwa akula abangekwenza njengoba ekhaya kungela misebenzi.

Inengi elichapha umfula uRamokgwebana lingena kwele Botswana liyabe likhangelele impilo engcono. Kodwa akulula ukuphila elizweni elingumakhelwane njengoba isingasatholakali imisebenzi elohlonzi.

UMnu. Dumisani Ncube, olezicoco zama degree ezimbili, kodwa ezithola esenza noma yiwuphi umsebenzi, uthi akuthambanga ukuphila eBotswana.

“Noma nje ngilama degree, ngicina ngisenza eminye imisebenzi ngoba kumele ngiphile. Emsebenzi siphiwa umsebenzi omnengi ungeke wakhonona, ngoba bayakuxotsha bedinge omunye wokuza ongasoke asole iholo eliphansi.”

UNkosazana Sihle Nyoni, osebenza ezindlini eGaborone, uthi akulula ngoba kabatholi iholo ngesikhathi njalo batshona bexotshaniswa ngamapholisa ngenxa yokuswelakala kwamaphepha okuhlala kwele Botswana.

“Impilo inzima, siqala ngokungena nzima emngeleni. Ungathola umsebenzi, ukuthi sithole imali kubayinkinga. Ungathi uyathonisa bayakubophisa ngoba uyabe ungelamaphepha. Siphila kanzima akulula.”

UMnu. Edson Madlala laye usebenza emawofisini. Uthi aMatswana akhangelela phansi abantu beZimbabwe.

“Akulula ukuhlala elizweni ongazalelwanga khona. Ukuvela eZimbabwe abantu basikhangelela phansi, kumele sihlale sihlukunyezwa. Ucina uzibuza ukuthi kumele impilo ibe kanje.”

UMadlala yena ukuhlangothi lwezemali elwe accounting kodwa uthi ngenxa yokuthi uvela eZimbabwe uzithola esenza umsebenzi ophansi, ecina engu Accounts Clerk njalo njengabanengi abeZimbabwe, kakho kumakampani amakhulu.

Usebenzela inkampani encane engaholisi okuyangaphi.

Njengo Madlala, uNcube uthi impilo eBotswana ayifani lalokho okucatshangelwa ngabanye abantu. Inengi lithatha noma yiwuphi umsebenzi ukwenzela ukuziphilisa.

Abafana loNcube, bayatholaka kwezinye izikhathi emigwaqweni yeGaborone, bedinga abantu abangabaqhatsha ukuze benze imsebenzi efana lokulungisa ezivandeni.

Udaba Esilethulelwe NguMartin Ngwenya
please wait

No media source currently available

0:00 0:02:46 0:00

Facebook Forum

XS
SM
MD
LG